«Memleket mektep oqýshylarynyń sapaly bilim alýy úshin barlyq jaǵdaıdy jasap keledi. Mektepke tońbaı barýy men qaıtýyn da nazarda ustaıdy. Tasymaldaý kezindegi qaýipsizdik te mańyzdy. Jańa avtobýstar oqýshylar úshin jyly, yńǵaıly ári qaýipsiz», dedi oblys ákimi Aıdarbek Saparov.
Avtobýstar kondısıoner jáne qaýipsizdik beldikterimen jabdyqtalǵan. Kólikte erekshe qajettiligi bar balalardyń muqtajdyqtary da eskerilip, pandýs pen júrgizýshini shaqyrý túımesi ornatylǵan.
Endi oblys boıynsha aýyl oqýshylaryn barlyǵy 143 avtobýs tasymaldaıdy. Avtoparkti jańartý jumysy jalǵasyn tabady.
Oblysta bilim salasyna qomaqty qarjy quıylyp jatyr. «Jaıly mektep» ulttyq jobasy aıasynda oblys ortalyǵynda 4 jańa mektep salynady. «Bereke» shaǵyn aýdanynda arnaıy mektep-ınternattyń qurylysy bastaldy.
Sonymen qatar bıyl 49 bilim nysanynda kúrdeli jóndeý júrgizilip jatyr. Sondaı-aq mektepterdiń materıaldyq-tehnıkalyq bazasyn nyǵaıtýǵa 2,2 mlrd teńge baǵyttaldy. Oqý oryndaryn táýlik boıy mamandandyrylǵan kúzetpen qamtamasyz etýge de qarajat bólindi.
Jańa oqý jylynda 1-4 synyp oqýshylary men balabaqshalarda áleýmettik turǵynda az qamtylǵan otbasylardyń balalary tegin ystyq tamaqpen qamtylady. Sonymen qatar «Jas órken» jáne «Bereke» shaǵyn aýdandarynda 2 balabaqshanyń qurylysy bastalady.
Soltústik Qazaqstan oblysy
