Osy maqsatta Indýstrııa jáne ınfraqurylymdyq damý vıse-mınıstri Ilııas Ospanov halyqaralyq qarjy ınstıtýttarynyń ókilderi men óńdeý ónerkásibi baǵytyndaǵy ınvestısııalyq jobalardy iske asyryp jatqan isker azamattarmen kezdesti. Atalǵan kezdesýge 15-ten asa halyqaralyq qarjy uıymynyń (onyń ishinde Azııa damý banki, Eýropalyq qaıta qurý jáne damý banki, Eýrazııalyq damý banki, Halyqaralyq qaıta qurý jáne damý banki, Japonııa Halyqaralyq yntymaqtastyq agenttigi), sondaı-aq Qazaqstannyń 14 óńirinen kelgen oblys ákimdikteriniń, kvazımemlekettik sektordyń jáne bıznes qaýymdastyqtyń ókilderi qatysty.
Avtomobıl joldary komıtetiniń tóraǵasy Tólegen Abdýllınniń aıtýynsha, «Aqtóbe – Ulǵaısyn – Qyzylorda» jol ýchaskesi, Qaraǵandy – Jezqazǵan baǵytyndaǵy kúrejol men Saryaǵash qalasyndaǵy aınalma joldyń qurylysyna baılanysty ınfraqurylymdyq jobalar bar. Tutastaı alǵanda, avtojol salasyn damytý sheńberinde 2030 jylǵa deıin 4,5 myń shaqyrym joldy salyp, jańartý kózdelgen.
Indýstrııalyq damý komıtetiniń tóraǵasy Azamat Panbaev halyqaralyq qarjy uıymdarynyń ókilderine munaı-gaz salasyndaǵy mashına jasaý óndirisi, qurylys materıaldarynyń ındýstrııasy, hımııa jáne jeńil ónerkásip, metall óńdeý jáne basqa salalardaǵy jetistikterge toqtalyp, otandyq óńdeý ónerkásibiniń perspektıvasy týraly aıtyp berdi. Indýstrııalyq damý komıtetiniń tóraǵasy aıtqandaı, qazir bolat balqytý jáne elektrolız zaýyttaryn salý, sondaı-aq alýan túrli daıyn ónimdi shyǵarýǵa qaýqarly kásiporyndardy qurýdyń mańyzdylyǵy artyp otyr.
«Biz jańa jobalardy iske asyrýǵa baılanysty halyqaralyq qarjy uıymdarynyń rólin joǵary baǵalaımyz. Bul oraıda memleket ınfraqurylymdy damytyp, ınvestorlarǵa bıznesti júrgizýge qajetti jaǵdaı jasaý úshin jeńildetilgen qarjylandyrýdy usyný jóninde qajetti sharalardy qabyldap keledi. Kásipkerlerdi biz usynyp otyrǵan artyqshylyqtardy paıdalanyp, óz ınvestısııalaryn Qazaqstanǵa salýǵa shaqyramyz. Bizdiń mınıstrlik qajetti qoldaýdy kórsetýge daıyn», dedi A.Panbaev.
Tikeleı yntalandyrý tetigi retinde О́nerkásipti damytý qory men Qazaqstannyń damý banki jelisi boıynsha jalpy somasy 500 mlrd teńgeden asa qarajatqa óńdeý ónerkásibine baılanysty jobalardy jeńildetilgen zaımdyq aqshamen qamtý josparlanyp otyrǵanyn atap ótken jón. Sonymen qatar jańa iri kásiporyndardyń iske qosylýy qosymsha jumys oryndaryn ulǵaıtýǵa jol ashpaq.
Kezdesýde «TehnoGrýppServıs», «Ordamed», «Evroglas ındastrız» kompanııalarynyń basshylary sóz aldy. Bıznes ókilderi ınvestısııalardy tartyp, tıisti jobalardy talqylaýǵa daıyn ekendigin jetkizdi.
