Foto: ashyq derekkóz
1 qyrkúıekten bastap memlekettik bıýdjet esebinen qarjylandyrylatyn uıymdardyń ıaǵnı dárigerler men balabaqsha tárbıeshileriniń jalaqysy artady. Memleket basshysy Qasym-Jomart Toqaevtyń tapsyrmasy boıynsha 2020 jyldan bastap tárbıeshilerdiń jalaqysy jyl saıyn 25 paıyzǵa ósti. Bıyl 30 paıyzǵa ulǵaıady. Elimizdegi jalpy bilim beretin mektepterdegi bastaýysh synyp oqýshylary tegin tamaqpen qamtylady. Tegin tamaqtandyrýda Almaty qalasy boıynsha ár balaǵa 800 teńge bólinse, basqa óńirlerde 577 teńge. Qyrkúıek aıynan stýdentterdiń, magıstranttardyń jáne doktoranttardyń shákirtaqysy da artady. Bakalavrıat dárejesi boıynsha bilim alýshy stýdentterdiń shákirtaqysy 20 paıyzǵa, magıstranttar men doktoranttarǵa 15 paıyz, tehnıkalyq jáne kásiptik bilim alýshy stýdentterge 50 paıyz qosylady. Joǵary oqý oryndarynyń professor-oqytýshylarynyń da eńbekaqysy 20 paıyzǵa ósedi. Memleket basshysynyń tapsyrmasyna sáıkes áleýmettik az qamtylǵan otbasy stýdentteriniń jataqhanaǵa jumsaıtyn shyǵyny sýbsıdııa esebinen tólenedi. Jańartylǵan «Bilim týraly» zań kúshine enedi. Soǵan sáıkes joǵary oqý oryndary stýdentterdi jataqhanaǵa ornalastyrýǵa mindetti bolady. Zań talaby oryndalmasa, aıyppul salynady.
Sonyment qatar osy aıdan bastap «Onlaın-platformalar jáne onlaın-jarnama» týraly zań qoldanysqa engiziledi. Bul zańda «onlaın-platforma paıdalanýshysy» jáne «ınflıýenser (bloger)» degen uǵymdardyń anyqtamasy aıqyndalyp, ınflıýenserdiń quqyqtary men mindetteri naqty jazylǵan. Budan bylaı ǵalamtor arqyly aqsha tabýshy bloger bitken jeke kásipker retinde tirkelip, tabys salyǵyn tóleıtin bolady.
«Janýarlarǵa jaýapkershilikpen qaraý týraly» zańnyń 11-babyna saı ıt pen mysyq asyraýshylar úı janýaryn esepke qoıyp, chıp saldyrýǵa mindetti bolady, oryndamasa aıyppul arqalaıdy. Biraq bul qyzmet aqyly negizde júzege asyrylady. Veterınarlar ıt, mysyqqa chıp salǵany úshin 3,5-8 myń teńge aralyǵynda aqsha alady. Halyqtyń áleýmettik osal toptary asyrap otyrǵan úı janýaryna chıp saldyrý aqysy bıýdjet esebinen óteledi.
