Jambyl aýdanyna qarasty Shoqaı aýylyndaǵy №3 orta mekteptiń jańa ǵımaraty paıdalanýǵa berildi. Osylaısha, aýyldyqtardy alańdatqan ózekti másele jańa oqý jylynda sátimen sheshildi. 150 oqýshyǵa arnalǵan jańa nysanda oqýshylardyń sapaly bilim alýyna barlyq múmkindik qarastyrylǵan.
– Búginde óńirdegi bilim nysandarynyń materıaldyq-tehnıkalyq bazasyn nyǵaıtýǵa basa mán berip otyrmyz. Oblys ortalyǵynan bólek, shalǵaıdaǵy eldi mekenderde de jańa nysandar boı kóterip jatyr. Apatty jaǵdaıdaǵy bilim oshaqtary men úsh aýysymda oqıtyn jáne oryn tapshylyǵy bar mektepterdiń máselesi jyl ótken saıyn sheshimin taýyp keledi. Atqarylǵan naqty jumystardyń nátıjesinde salada jetken jetistikter az emes. Bıyl aǵartýshy salaǵa 284,8 mlrd teńge qarastyryldy. Bul oblys bıýdjetiniń jartysynan joǵary. Sondaı-aq qazirgi tańda 25 bilim nysanynyń qurylysy júrgizilip jatyr. Jyl sońyna deıin 9 mektep pen 5 mekteptiń japsarlas qurylysy aıaqtalady. Al 11 nysan kelesi jyly paıdalanýǵa beriledi. Shoqaı aýylynyń oqýshylary jańa mekteptiń tabaldyryǵyn attap otyr. Osylaısha, aýyldaǵy oryn tapshylyǵy bar №3 mekteptiń máselesi tolyqtaı sheshildi. Endi balalar zamanaýı talapqa saı jabdyqtalǵan úlken bilim ordasynda bilim alady, – dedi bilim ordasynyń ashylý saltanatynda oblys ákiminiń birinshi orynbasary Nurjan Kalenderov.
Ol balalardyń alańsyz bilim alýy úshin memleket tarapynan kórsetiletin qoldaý jalǵasa beretinin tilge tıek etip, óńir basshysynyń atynan 10 noýtbýk syılady. Aýyl azamattarynyń atynan sóz alǵan Bolat Qojabekov turǵyndardyń ótinishin der kezinde oryndaǵan jergilikti atqarýshy bılikke alǵys aıtty.
Ǵımarat qurylysyn júrgizgen «Taraz Stroı-2004» JShS ókili Qýat Baqqaraev jańa mekteptiń sımvolıkalyq kiltin mektep dırektoryna tabystady. Jańa mektep sportzaly, májilis zaly, sheberhana, tigin bólmesi, robottehnıka sekildi ózge de qajetti kabınettermen jabdyqtalǵan.
Jambyl oblysy,
Jambyl aýdany
