https://primeminister.kz/
Italııa Qazaqstannyń álem boıynsha iri úsh saýda seriktesiniń biri sanalady. Ári Eýropalyq odaq elderi arasynda birinshi orynda tur. Byltyr eki eldiń taýar aınalymy 55%-ǵa jýyq artyp, shamamen $15 mlrd-qa jetti. Italııa Eýropalyq odaq elderdiń arasynda Qazaqstan ekonomıkasynyń órkendeýi úshin áriptestik ornatqan iri ınvestorlardyń bestigine kiredi. Sońǵy 17 jylda jalpy tartylǵan ınvestısııalar kólemi $7,3 mlrd-qa jetti. Byltyrǵy jyldyń qorytyndysy boıynsha shamamen 2,5 ese ósip, $300 mln-ǵa jýyqtady.
«Degenmen taýar aınalymyn odan ári arttyrýǵa áleýetimiz jetkilikti. Biz Italııaǵa jalpy quny $900 mln-nan asatyn qazaqstandyq 110 taýar óniminiń eksportyn arttyrýǵa daıynbyz», dedi Álıhan Smaıylov.
Antonıo Taıanı Italııa Qazaqstanmen jan-jaqty, ásirese saýda, energetıka jáne ónerkásip boıynsha yntymaqtastyqty nyǵaıtýǵa qashanda qumbyl ekenin jetkizdi. «Biz Italııada birlesken kásiporyndardy, jańa qazaqstandyq kompanııalardy ashýǵa daıynbyz. Sondaı-aq kásiporyndarymyz arasyndaǵy yntymaqtastyqty odan ári nyǵaıtýǵa yqpal etetin Iskerlik keńes qurýǵa nıettimiz», dedi ol.
A.Taıanı Almatyda jańa ıtalıandyq mádenıet ınstıtýtyn ashýdyń mańyzy zor ekenin, eki el arasynda stýdentter almasýdy arttyrýǵa múmkindik beretinin aıtty.
