https://www.akorda.kz/
Prezıdentke barlyq negizgi ekonomıkalyq kórsetkish boıynsha oń dınamıka baıqalatyny jaıynda málimet berildi. Bıylǵy 7 aıda ınvestısııa kólemi 9,2 paıyzǵa ulǵaıyp, 678,5 mıllıard teńgege jetti. Jyl sońyna deıin jalpy somasy 87 mıllıard teńge bolatyn 25 ınvestısııalyq jobany iske qosý josparlanǵan. Onyń 15 jobasy óńdeý ónerkásibi salasynda júzege asyrylady.
Memleket basshysyna qalanyń tynys-tirshiligin qamtamasyz etetin nysandar qurylysynyń barysy týraly baıandaldy. Gazben jylytý stansııalary men 3-JEO aldaǵy jylytý maýsymynda iske qosylady dep josparlanyp otyr. Olar saǵatyna 1100 Gkal jylý beredi. Bul elordada jylý energııasyna degen suranysty artyǵymen qamtamasyz etýge yqpal etedi.
Budan bólek, qala ákimi áleýmettik nysandar salý (mektepter, jeńildikpen beriletin qoljetimdi turǵyn úıler, medısınalyq ortalyqtar), uzaqqa sozylǵan qurylystardy aıaqtaý, apatty jaǵdaıdaǵy jáne eski úılerdi buzý, turǵyn úı alaptaryn damytý, qalany abattandyrý jáne kógaldandyrý jaıynda aıtty. Sondaı-aq bıylǵy oqý jylynda Astanada 11 mektep salynatynyn, onyń tórteýi qazir jumys istep jatqanyn jetkizdi. «Jaıly mektep» ulttyq jobasy aıasynda 2024-2025 jyldary 90 myńǵa jýyq oqýshyǵa arnalǵan 24 mektep salynady. Onyń 15-i qarqyndy damyp kele jatqan Esil jáne Nura aýdandarynda boı kótermek.
Prezıdent Qasym-Jomart Toqaev qalanyń áleýmettik jáne ınjenerlik ınfraqurylymyn odan ári damytýǵa, jylytý maýsymyna daıyndyǵyna jáne abattandyrý jumystaryna qatysty birqatar tapsyrma berdi.
