Foto: https://www.parlam.kz/
«Jaz kelse boldy temirjol tasymalyna shaǵym kóbeıedi, jylda solaı. Jolaýshylar tasymaly quramynyń kóp bóligi - keńestik kezeńniń murasy. Jyl saıyn biz vagondar parkin jańartý máselesin kóteremiz, iske asyrýǵa kelgende nátıje joq. Qazirgi ýaqytta temirjol quramynyń 60%-y tozǵan, paıdalanýǵa jaramaıdy. Al mınıstrlik pen QTJ temir jol vagondary parkin túbegeıli jańartýdy 2030 jylǵa josparlap otyr eken. Ulttyq kompanııa 1997 jyly quryldy, 26 jyl kútkenimiz azdaı, taǵy 7 jyl kútýimiz kerek. Kútken kúnniń ózinde vagondar parkiniń tıimdi bolatynyna senim az. 2030 jyly qalǵan vagondar eskirip, temirjol quramy parkiniń tozýy 80%-ǵa artyp ketpeıtinine kim kepil?», dedi depýtat.
Elnur Beısenbaevtyń aıtýynsha, tozyǵy jetken vagondarǵa bılet satyp alý armanǵa aınaldy.
«Bılet tapshylyǵynyń azabyn tartqan halyqtyń «Amanat» partııasyna joldaǵan aryz-shaǵymy tym kóbeıdi. Bılet tapqan kúnniń ózinde eski vagondardyń jaǵdaıy qynjyltady. Jyldan-jylǵa azamattardyń ishki týrızmge degen qyzyǵýshylyǵynyń sany artqanyn kórip otyrmyz. Sondyqtan suranysty qamtý úshin temirjol máselesin túbegeıli sheshýdi suraımyz», dep túıindedi depýtat.
