Kollajdy jasaǵan –Záýresh Smaǵul, «EQ»
Prezıdent sóz basynda aıtqandaı, muǵalimder men dárigerlerdiń eńbekaqysy ósti. Mıllıonǵa jýyq el turǵyny zeınetaqy jınaǵynyń bir bóligin paıdalanyp, turǵyn úı máselesin sheshti. Munyń barlyǵy ras. Qazirgi tańda «Jaıly mektep» jobasy aıasynda 400-ge jýyq mektep salý qolǵa alynǵan. Aýyldyq jerde 300-den astam densaýlyq saqtaý nysany salynyp jatyr. «Ulttyq qor – balalarǵa» jobasy da keler jyldan bastap júzege aspaq. Sonymen qatar ıgerilmeı jatqan nemese zańsyz berilgen 8 mıllıon gektar jer memleket menshigine qaıtarylǵanyn jetkizdi Prezıdent. Munyń barlyǵy sońǵy jyldardaǵy eleýli ózgerister deýge bolady.
Endi jańa Joldaýynda Memleket basshysy Sý resýrstary jáne ırrıgasııa mınıstrliginiń qurylatynyn jetkizdi. Keıingi ýaqytta sý tapshylyǵy jıi kórinis berip keledi. Bul – Ortalyq Azııa memleketterine ortaq másele. Bul rette Qasym-Jomart Kemeluly: «Elimiz úshin sýdyń mańyzy munaı, gaz nemese metaldan kem emes. Sý sharýashylyǵy júıesin tıimdi damytý máselesimen derbes mekeme aınalysýy qajet dep sanaımyn», dep jańa mınıstrlik qurýdy tapsyrdy.
Memleket basshysynyń óndiristik jaraqat týraly Joldaýda aıtýy onyń bul máselege nazar aýdaryp otyrǵanyn kórsetedi. О́ndiris bizdiń óńir úshin birinshi kezekte tur. Sondyqtan óndiris qaýipsizdigi máselesi oblys úshin mańyzdy. Prezıdent Úkimetke jyl sońyna deıin 2030 jylǵa deıingi qaýipsiz eńbek tujyrymdamasyn qabyldaýdy tapsyrdy. «Bul qujat jumys ornyndaǵy kásibı syn-qaterlerdiń aldyn alýǵa jáne joıýǵa baǵyttalýy kerek», dep atap ótti.
Zara ShALABAEVA,
Qaraǵandy oblystyq
máslıhatynyń depýtaty
