Foto: https://www.akorda.kz/
1. Qazaqstan Respýblıkasynyń Prezıdenti Qasym-Jomart Toqaevtyń shaqyrýymen 2023 jylǵy 6-8 qyrkúıekte Albanııa Respýblıkasynyń Prezıdenti Baıram Begaı Qazaqstan Respýblıkasyna resmı saparmen keldi.
2. Memleketter basshylary jyly, dostyq jáne iskerlik sıpatta kelissózder júrgizip, dıplomatııalyq qatynastardyń 30 jylynda qol jetkizilgen qazaq-alban qatynastarynyń damý nátıjelerine joǵary baǵa berdi. Qazaqstan men Albanııa arasyndaǵy baılanystar deńgeıin odan ári kóterýge, túrli salalardaǵy yntymaqtastyqty tereńdetýge ýaǵdalasyp, ózara qyzyǵýshylyq týdyratyn óńirlik jáne halyqaralyq kún tártibindegi máseleler boıynsha pikir almasty. Prezıdentter eki el arasyndaǵy saıası jáne ekonomıkalyq yntymaqtastyqtyń joǵary dınamıkasyn quptady.
3. Taraptar jahandyq jáne óńirlik deńgeıde beıbitshilikti, qaýipsizdik pen turaqtylyqty nyǵaıtýǵa járdemdesýge degen nıetterin bildirdi. Olar halyqaralyq quqyqqa jáne BUU Jarǵysynyń negizgi qaǵıdattaryna qatysty ustanymdarynyń myzǵymaıtynyn atap ótti. Osyǵan baılanysty taraptar Almatyda Ortalyq Azııa men Aýǵanstan úshin ornyqty damý maqsattary boıynsha BUU О́ńirlik ortalyǵyn jáne Bıologııalyq qaýipsizdik jónindegi halyqaralyq agenttik qurý týraly Qazaqstannyń bastamalaryn joǵary baǵalady.
4. Memleket basshysy Albanııany 2022-2023 jyldar aralyǵynda BUU Qaýipsizdik Keńesine turaqty emes múshe bolýymen quttyqtady.
5. Taraptar eki elde júrgizilip jatqan reformalardy jáne Qazaqstan men Albanııa halyqtarynyń ál-aýqatyn arttyrýǵa baǵyttalǵan turaqty ishki saıası jáne áleýmettik-ekonomıkalyq damý jónindegi sharalardy joǵary baǵalady.
6. Memleketter basshylary Ortalyq Azııada Transkaspıı halyqaralyq kólik baǵytyn damytýǵa qatysty aýqymdy bastamalardyń iske asyrylýyna qanaǵattanýshylyq bildirdi.
7. Taraptar óz elderiniń ekonomıkalyq damýy úshin ınvestısııalyq saıasattyń ashyqtyǵyn, turaqtylyǵyn ári boljamdy bolýyn odan ári arttyrýǵa daıyn ekenin bildirip, ınvestorlar úshin turaqty, ashyq jáne boljamdy iskerlik ortany qamtamasyz et úshin kúsh-jiger jumsaýdy jalǵastyrýǵa, sondaı-aq ózara tıimdilikti júzege asyrý úshin yntymaqtastyq jobalaryna birlesip járdemdesýge jáne ınvestorlardyń quqyqtary men múddelerin qamtamasyz etýge kelisti.
8. Taraptar eki el arasynda tikeleı áýe qatynasyn ashýǵa jáne avıasııalyq reıster men baǵdarlar sanyn odan ári ulǵaıtýǵa múddelik tanytty.
9. Memleketter basshylary 2022 jylǵy 22 qyrkúıekte Nıý-Iork qalasynda qol qoıylǵan Vızalyq talaptardan ózara bosatý týraly eki eldiń úkimetaralyq kelisiminiń kúshine enýin qanaǵattanýshylyqpen atap ótip, atalǵan qujatty iske asyrýǵa, adamdardyń júrip-turýy úshin barynsha qolaıly jaǵdaı jasaýdy yntalandyrýǵa jáne kóshi-qon salasyndaǵy yntymaqtastyqtyń normatıvtik bazasyn keńeıtýge baǵyttalǵan sharalardy zerdeleýge ázir ekenin bildirdi.
10. Taraptar eki eldiń óńirleri arasyndaǵy ártúrli saladaǵy yntymaqtastyqty qoldap, Qazaqstan men Albanııa halyqtarynyń arasyndaǵy baılanystardy bekemdeý úshin eki eldiń yntymaqtastyq áleýetin nyǵaıta túsetin elordalar men basqa qalalardyń baýyrlastyq qatynastar ornatýyn quptady.
11. Prezıdentter mádenıet salasyndaǵy yntymaqtastyqty arttyrýǵa nıet bildirip, aldaǵy jyldary birlesken is-sharalar ótkizýge baǵyttalǵan bastamalardy qoldady.
12. Memleketter basshylary kelissózder barysynda qol jetkizilgen ýaǵdalastyqtar ártúrli saladaǵy ekijaqty yntymaqtastyqty odan ári damytýǵa tyń serpin beretinine jáne Qazaqstan men Albanııa halyqtarynyń múddelerine qyzmet etetinine senim bildirdi.
