Foto: Ashyq derekkóz
Ulttyq sportty órkendetýge baǵyttalǵan jıynǵa 60-tan astam eldiń úkimettik sheneýnikteri, federasııa ókilderi men ǵalymdary, sondaı-aq qazirgi ýaqytta Dúnıejúzilik etnosport konfederasııasyna kirgen elderdegi arnaıy mekemelerden 24 ókil keldi. Sondaı-aq sammıtke Dúnıejúzilik etnosport konfederasııasynyń prezıdenti Najmeddın Bilál Erdoǵan men О́zbekstan Respýblıkasy Jastar saıasaty jáne sport mınıstri Adham Ikramovtyń arnaıy shaqyrtýymen Qazaqstan Respýblıkasy Týrızm jáne sport vıse-mınıstri Sársen Quranbek pen Qazaqstan Respýblıkasy Ulttyq sport qaýymdastyǵynyń prezıdenti Islambek Saljanov ta qatysty.
Sammıt aıasynda Joǵary deńgeıdegi Mınıstrler alqasy, etnosport festıvali jáne Dúnıejúzilik etnosport konfederasııasy músheleriniń VI kezdesýi sııaqty mańyzdy is-sharalar uıymdastyryldy.
Talqylaýlar ótken keleli jıyndarda ulttyq sport túrlerin damytý jáne onyń aýqymyn keńeıtý máseleleri qozǵalyp, naqty usynystar aıtyldy.
Jıynda arnaıy sóz alǵan Qazaqstan Respýblıkasy Ulttyq sport qaýymdastyǵynyń prezıdenti Islambek Saljanov sammıtke qatysýshylardy kelesi jyly Qazaqstanda ótetin V Dúnıejúzilik Kóshpendiler oıyndaryna shaqyryp, birqatar máseleni kóterdi.
«Álemdik tájirıbege súıenetin bolsaq, qandaı da bir sport túrin joǵary deńgeıge kóterý úshin eń aldymen ony reglamenttep, erejesin jasap jetildirý qajet. Onsyz eshqandaı sport tıisti deńgeıde damymaıdy.
Sol sekildi túrkitildes memleketter jınalyp ulttyq sport túrlerine ortaq ereje bekitip, normatıvtik bazasyn qalyptastyrý arqyly bolashaqta ulttyq sporttyń bir túrin Olımpıada oıyndarynyń baǵdarlamasyna kirgizsek barshamyzdyń ortaq jeńisimiz bolar edi.
Sondyqtan da Búkilálemdik etnosport konfederasııasyna múshe barlyq memleketter judyryqtaı jumyla alǵa qoıǵan ortaq maqsattarymyzǵa jetemiz degen úmittemin», dep aıtty Qazaqstan Respýblıkasy Ulttyq sport qaýymdastyǵynyń prezıdenti Islambek Saljanov.
Aıta keteıik, búginde Dúnıejúzilik etnosport konfederasııasyna 16 memleket múshe. Olar: Qazaqstan, Qyrǵyzstan, Túrkııa, Ázerbaıjan, Mońǵolııa, Vengrııa, Grýzııa, Reseı, Argentına, Japonııa, Meksıka, Polsha, Katar, Rýmynııa, Týnıs, Lıtva.
