Mýzeı ishin aralap júrip, Qalaǵańnyń jeke zattary qoıylǵan buryshta uzaq aıaldadyq. Qalamger kózi tirisinde erekshe jan bolǵan desedi. Ásirese qarııa shaǵynda áskerı kıimmen túsken fotosýreti qandaı áserli.
Mynaý sýrettegi máshińke – Qalaǵańa jarty ǵasyrǵa jýyq serik bolǵan jazý quraly. Qazir qaz-qalpynda saqtalyp tur. 2001 jyly Qalmuqan Isabaev Kerekýge kelgende óz qolymen mýzeıge syıǵa tartyp ketipti.
– Qalamger ómiriniń 12 jylyn áskerde, sonyń ishinde eki jylyn soǵysta ótkergeni málim. Maıdannan keıin Germanııanyń Ilmenaý qalasynda komendant bolyp qyzmet etti. German jerindegi «Groma Gromina» kompanııasy ol tusta tek latyn qarpindegi jazý máshinkelerin shyǵarypty. Mynaý baspa máshińkesi 1952 jyly Arnshtad degen eldi mekende kırıllısa áripterimen arnaıy jasalǵan. Ekinshi dúnıejúzilik soǵys ardageri, jazýshy Qalmuqan Isabaev komendanttyqtan bosap, týǵan elge oralýǵa daıyndalyp jatqanda sondaǵy germanııalyq áriptesteri syılaǵan, – deıdi mýzeıdiń qor saqtaýshysy Álııa Samatova.
Jazýshy Germanııa jerimen rýhanı baılanysyn úzbegen. Ilmenaý qalasynan tórt shaqyrym jerdegi Gabelbahta ornalasqan nemistiń uly aqyny Geteniń murajaıyna 1979 jyly Abaıdyń «Qarańǵy túnde taý qalǵyp» aýdarmasyn tabys etedi. Keıin onda Abaıǵa arnalǵan shaǵyn múıis ashtyryp, qazaqtyń dombyrasyn qoıǵyzyp qana qoımaı, 2000 jyly uly aqynymyzdyń atyna Berlınde kóshe berýge uıytqy bolady.
Pavlodar oblysy
