Solardyń biri – Aqtaý qalasynda “Balapan” baǵdarlamasy aıasyndaǵy “Qarlyǵash” atty shaǵyn balalar ortalyǵy. Aımaǵymyzda alǵash ashylǵan jeke menshik ortalyqta balalar tárbıesi úshin barlyq jaǵdaı jasalǵan. Jumysqa tájirıbeli mamandar tartylypty. Ortalyq basshysy aımaqqa belgili azamat, ǵylym kandıdaty Álimjan Saǵynbaev osynaý balalar mekemesin ózi basqaratyn “Meıirbıke” medısınalyq kolledji janynan ashyp ózderi ornalasqan shaǵyn aýdan turǵyndarynan ıgi tilek, jyly lebiz estidi. Elbasy Nursultan Nazarbaevtyń balalarǵa degen ákelik qamqorlyǵyna saı osy jyldyń aıaǵyna deıin Aqtaýda 17 balabaqsha ashý kózdelýde, – deıdi oblys ákiminiń orynbasary Qanybek Jumashev. Jalpy, mektepke deıingi balalar mekemeleriniń aýyldyq jerlerde de jıi ashyla bastaýyn quptarlyq jaǵdaı deýge bolady.
Jolaman BOShALAQ, Mańǵystaý oblysy.
BÚLDIRShINDERDI QÝANTYP QAITTY. Oblys ortalyǵyndaǵy otbasylyq úlgidegi balalar aýylyna jomart jandar árkez demeýshilik jasap turady. Bul joly onyń tárbıelenýshilerine bank qyzmetkerleri ózderiniń syı-sııapattaryn arqalaı keldi. Aldymen balalar aýylyna “Eýrazııalyq bank” ókilderi atbasyn tirep, 70 myń teńgeniń tartýyn syılasa, olardan keıin ile-shala kelgen “Halyq banki” zeınetaqy qorynyń qyzmetkerleri de mol bazarlyqpen qýantty. 200 myń teńgeniń zattaı syılyqtaryn usynyp, 22 balaǵa demalys lagerlerine joldama úlestirdi. Al “Qazposhta” AQ jergilikti fılıaly 63 myń teńgege aıaq-kıim jáne sandyq fotokamera syılady. Búldirshinder jaqsy oqýǵa, tártipti bolýǵa ýáde etip, án-jyrdan shashý shashty.
О́mir ESQALI,Soltústik Qazaqstan oblysy.
KÁSIPORYN AIYPPULǴA KESILDI. Tabıǵat kenishin ıgerip jatqan kásiporyndardyń keıde ózimbilemge salynyp, jalǵandy qonyshynan basatyn ýaqyttary bolady. Bul, ásirese, qorshaǵan ortaǵa baılanysty. Mundaıda olarǵa zańdyq turǵyda toqtam salardaı pármen kerek. Sozaqta ýran kenishin ıgerip jatqan “Katko” birlesken kásipornynyń qorshaǵan ortaǵa keltirilgen zalaly anyqtalyp, 15,5 mln. teńge aıyppul salyndy. Sot sheshimimen tólendi. Sóıtip, oblystyq prokýratýranyń ymyraǵa barmaıtyndyǵy ózge kásiporyndardyń ekologııa máselesine sergek qaraýyna oń yqpal etýde.
Baqtııar TAIJAN, Ońtústik Qazaqstan oblysy.
JAŃA BASShYLAR TAǴAIYNDALDY. Oblystaǵy halyqtyń áleýmettik jaǵdaıymen tikeleı aınalysatyn jumyspen qamtýdy úılestirý jáne áleýmettik baǵdarlamalar men jolaýshy kóligi jáne avtomobıl joldary basqarmalaryna jańa basshylar taǵaıyndaldy. Oblys ákiminiń ókimimen buǵan deıin oblystyq jumyspen qamtýdy úılestirý jáne áleýmettik baǵdarlamalar basqarmasy bastyǵynyń orynbasary laýazymyndaǵy Umsyn Balabıeva atalǵan basqarmaǵa, al oblystyq jolaýshy kóligi jáne avtomobıl joldary basqarmasyna buǵan deıin orynbasar laýazymyndaǵy Qobylan Manapov sol mekemege bastyq bolyp taǵaıyndaldy. Demek, jańa laýazymdaǵylarǵa atalǵan saladaǵy jumys tanys, ári ujymmen baılanystarynyń qalyptasqanyn kórsetedi.
Kúmisjan BAIJAN, Almaty oblysy.
ULT BIRLIGI – EL UIYTQYSY. “Jas ǵalymdar alıansy” qoǵamdyq birlestiginiń bastamasymen “Yntymaǵy jarasqan elde baq turar” atty túrik etnoortalyǵy ókilderimen qyzǵylyqty kezdesý boldy. Onyń barysynda san alýan ult ókilderi ulttar tatýlyǵy jaıly pikir almasyp, “El birligi” doktrınasy jaıly óz oılaryn ortaǵa saldy. Qorqyt ata atyndaǵy QMÝ-inde bilim alyp jatqan túrik stýdentteri ózderiniń Qazaq eline degen qurmetteri zor ekenin stýdent-jastardyń tatý-tátti ómir súrýiniń mańyzy asa zor bolyp tabylatynyn jetkizdi. Kezdesý áleýmettik senimdilikti qalyptastyrý jáne ult birligi men qaı ulttyń bolmasyn turaqty damýyn qamtamasyz etýdi murat tutty. Mundaı kezdesýler tarıhy tereń, taǵdyry bir ulttar úshin aldaǵy ýaqytta da jalǵasyn taba bermek.
Erkin ÁBIL, Qyzylorda.
ELI AQYNYN QURMETTEDI. О́ziniń lırıkaǵa toly, adam janyn izgilikke bóleıtin óleńderimen erekshelenetin talantty aqyn Nurlan Máýkenulynyń aramyzdan ketkenine 5-6 jyl boldy. Alaıda, aqyn uldaryn zaısandyq jerlesteri umytpapty. Zaısan aýdandyq máslıhatynyń depýtattary burynǵy Gagarın kóshesin aqyn Nurlan Máýkenulynyń atymen ataý jóninde sheshim qabyldady. Nurlan Máýkenuly uzaq jyldar Zaısanda, О́skemende qyzmet jasady. Kendi Altaıdyń ósip-órkendeýi, ǵajaıyp adamdary onyń qanatty jyrlaryna arqaý boldy. О́mirden qyrshyn ketken sezimtal aqynnyń esimin ózi oqyǵan Jambyl aýylyndaǵy orta mektepke berý jónindegi uıǵarym bul kúnderi oblystyq onomastıka komıssııanyń qaraýynda jatyr.
Ońdasyn ELÝBAI, Shyǵys Qazaqstan oblysy, Zaısan aýdany.
TALANTTY SAZGERGE TAǴZYM. Bıylǵy jyly Semeıdegi Muqan Tólebaev atyndaǵy mýzyka kolledjiniń qurylǵanyna – 55, al osy oqý ornynda qyryq jyl eńbek etken belgili sazger, ulaǵatty ustaz Temirjan Bazarbaevtyń týǵanyna 75 jyl tolyp otyr. Jýyrda Abaı atyndaǵy drama teatrynda ótken atalǵan kolledj túlekteriniń esep berý konserti talantty sazgerdiń mereıtoıy qurmetine arnaldy. Osy sharanyń qarsańynda Temkeń turǵan úıge eskertkish taqta ornatyldy. Sonyń báriniń basy-qasynda kolledj dırektory Otantaı Káribjanov júrgenin aıta ketken jón.
Dáýlet SEISENULY, Semeı.
EL IShINDE TALAPTY JASTAR KО́P. О́tken aptada oblys ortalyǵyndaǵy “Shańyraq” dep atalatyn halyq shyǵarmashylyǵy men mádenı-saýyq qyzmeti saraıynda ótken aýyl jastarynyń basyn qosqan “Nar táýekel!” atty saıys osyny kórsetti. Rasynda da, el ishinde talantty jastar turǵanda aýyl keshiniń kóńildi, oıyn-saýyq dýmanǵa toly ekeni de sózsiz. Oblystyq mádenıet basqarmasynyń uıymdastyrýymen ótken bul saıysqa Ekibastuz, Aqsý qalalarynyń aýyldyq aýmaqtarynan jáne oblys ortalyǵyna jaqyn ornalasqan Pavlodar aýdanynan aýyl jastary qatysty. Shalǵaıdaǵy aýyldardyń jastary da qazir kelesi saıysqa daıyndyq ústinde. Al bul joly ónerli ónerpazdar anyqtalyp, Kenjekól, Shaqat, Jetekshi aýyldarynyń jastaryna syı-sııapat jasaldy.
Farıda BYQAI, Pavlodar.
