Foto: Erlan Omar\EQ
Stýdentter aldymen «Egemen Qazaqstan» gazetiniń redaksııasyn aralap, gazet jýrnalısteriniń jumysymen tanysty. «Qazaq gazetteri» JShS Bas dırektorynyń orynbasary Qambar Ahmet quramyna birneshe basylym kiretin medıa seriktestiktiń jumysy týraly maǵlumat berdi.
Sondaı-aq kezdesýge «Egemen Qazaqstan» gazetiniń bas redaktory Ǵabıt Iskenderuly, bas redaktordyń orynbasarlary Talǵat Batyrhan men Baný Ádiljan, ınternet-redaksııa jetekshisi Qýat Áýesbaı qatysty.
Basqosý barysynda Ǵabıt Iskenderuly men Talǵat Batyrhan buryn áskerı jýrnalıstıka salasynda azdy-kópti qalam terbegendikterin aıta kele, sol kezderdegi estelikterin áńgimelep berdi. Stýdentter bolsa, ózderin qyzyqtyrǵan saýaldarǵa jaýap alyp, kásibı mamandardyń keńesin tyńdady. Gazet qyzmetkerleri joǵary oqý oryndarynda salalyq jýrnalıstıkaǵa, onyń ishinde áskerı jýrnalıstıkaǵa mán berilip jatqanyna rızashylyq bildirip, bul baǵytta bilim alyp jatqan stýdentterge sáttilik tiledi.
Áskerı kafedra oqytýshysy, belgili jýrnalıst Ábýbákir Smaıylovtyń aıtýynsha, áskerı jýrnalıstıka bólimine qabyldanǵan qyz-jigitter tek jýrnalıstıka fakýltetiniń ǵana emes, ártúrli fakýltettiń stýdentteri eken. 2 kýrsqa kóshken olar - áskerı jýrnalıstıka bóliminiń alǵashqy toby. Bıyl taǵy bir top 1 kýrsqa qabyldanǵan. Stýdentter áskerı tarıh, onyń ishinde áskerı jýrnalıstıka tarıhy jaıly oqyǵan, endi «aqparattyq soǵys», jýrnalıstiń quqyǵy syndy taqyryptardy oqyp jatyr. Olar keleshekte leıtenant shenin alyp, zapastaǵy ofıser bolyp shyǵady, jazýǵa da mashyqtanyp, áskerı gazetterge, baǵdarlamalarǵa jumysqa tura alady.
Ábýbákir Smaıylov kezdesý sońynda «Qazaq gazetteri» ujymyna alǵys aıtyp, «aldaǵy ýaqytta gazet redaksııasymen yntymaqtastyq jalǵasa bersin» dep tilek bildirdi.
«Kezdesý bizge óte paıdaly boldy degen oıdamyz, jýrnalıstıka sheberleriniń qalaı jumys isteıtinin kórý - úlken tájirıbe, kóp nárse úırený kerektigin túsindik, aldaǵy ýaqytta aqparat jazý arqyly tájirıbemizdi shyńdaımyz», dep stýdentter kezdesýden alǵan áserin bólisti.
