Foto: ashyq derekkóz
«Ekonomıkany yntalandyratyn ádil salyq saıasatyn júrgizý qajet. Salyq zańnamasynyń kúrdeliligi men turaqsyzdyǵyna bıznestiń shaǵymdanýy azaımaı tur. Bul ınvestorlardyń senimin azaıtyp, bızneske joq jerden másele týyndatady. Salyq organdary kásipkerlerdi jappaı sotqa tartyp jatyr. Atap aıtqanda, kelisimderdi jaramsyz dep taný jóninde talap-aryzdar kóp beriledi. Sottardyń júktemesi edáýir artty. Olarǵa salyqtyń durys tólenýin tekserý mindeti de júkteldi. Buǵan jol berýge bolmaıdy. Jaǵdaıdy túzeý úshin sharalar qajet. Úkimet jańa Salyq kodeksinde salyqtan jaltarýǵa qarsy is-qımyldyń tıimdi mehanızmin qarastyrýy qajet. Sondaı-aq taýarsyz operasııalardy anyqtaýdyń naqty krıterıılerin anyqtaý kerek. Zańnama neǵurlym ońaı bolsa, ony qate túsiný yqtımaldyǵy da soǵurlym azaıady. Sondyqtan rásimderdi túbegeıli qysqartyp, ekiushty tujyrymdardy joıý qajet. Barlyq daýly jaǵdaı salyq tóleýshilerdiń paıdasyna qaraı túsindirilýi kerek», dedi Memleket basshysy.
Sondaı-aq Prezıdent eldiń ekonomıkasyna quıylatyn salyqtyń basym bóligi kásipkerlerden túsetinin de atap ótti.
«Eldegi salyqtyń 80 paıyzyn 260-qa jýyq kompanııa tóleıdi. Bul teńgerimsizdikti basqa salyq tóleýshilerdiń salyqtyq túsimin arttyrý arqyly túzetý kerek. Sarapshylardyń baǵalaýyna sáıkes, elimizde jumyspen qamtylǵan jalpy halyqtyń tórt mıllıony tabysynan salyq tólemeıdi. Jeńildetilgen salyq rejımi engizilgenine qaramastan, mıkro jáne shaǵyn bıznes sýbektileri tabysyn jasyryp, aqsha aınalymyn azaıtyp kórsetedi. Bıznes sýbektileriniń 70 paıyzǵa jýyǵy jeńildetilgen deklarasııada 5 mıllıonnan az tabys kórsetip, osy rejım aıasyndaǵy túsimderdiń 6 paıyzyn ǵana tóleıdi. Sondyqtan salyq prosedýralaryn jeńildetip, halyqpen jáne bıznespen tıimdi qarym-qatynas jasaý arqyly belsendi salyq tóleýshilerdi kóbeıtý jańa salyq saıasatynyń negizgi maqsattarynyń biri bolýǵa tıis. Salyq tóleýden jaltarýdan, jergilikti baqylaýshy organdarmen til tabysyp, táýekelge barýdan góri salyq tóleý tıimdi ári ońaı bolýy kerek. Salyq zańnamasyn ózgertý jumystaryn sozbalańǵa salýǵa bolmaıdy», dedi Q.Toqaev.
Prezıdent keıingi on jyldaǵy kórsetkishke súıenip, kompanııalardan túsetin taza tabys pen negizgi kapıtalǵa quıylǵan ınvestısııanyń araqatynasy da aıtarlyqtaı kemigenin, kásipkerler óziniń tabysyn bıznesin qaıta jandandyrýǵa ınvestısııa retinde salýǵa yqylasty emes ekenin jetkizdi. Ulttyq ekonomıkanyń ósimine ınvestısııanyń tapshylyǵy shekteý bolyp otyrǵany da aıtyldy.
«Sonyń saldarynan jańa óndiristik qýat, jańa jumys oryndaryn ashý jáne bıýdjetke túsetin tólemderi ǵana azaımaıdy. Biz pozısııamyzdan aıyrylyp jatyrmyz. Negizgi qorlar fızıkalyq jáne tehnologııalyq turǵydan eskirip, jańarmaı otyr. Bul jalpy problemaǵa ınvestısııalyq aǵyndy ártaraptandyrýdyń báseńdeýi de áser etedi. Bizdegi sheteldik salymnyń basym bóligi (68%) burynǵydaı shıkizat sektoryna tıesili. Kerisinshe qaıta óńdeý ónerkásibi, elektr qýatyn óndirý, kólik jáne basqa da salalardan sheteldik ınvestorlardyń ketýi baıqalady. Jýyrdaǵy Joldaýymda korporatıvtik nesıelendirýdi qoldaýǵa baǵyttalǵan sheshimder aıqyndaldy. Eń aldymen, ınvestorlar salyqtan jáne basqa da tólem mindettemelerinen úsh jylǵa bosatý mindeti tur. Úkimet bıznes-qoǵamdastyqpen birlesip, ekonomıkanyń basym sektorlaryna ınvestısııa tartýǵa yqpal etetin qosymsha úsh-tórt naqty sharany pysyqtaýy kerek», degen Prezıdent birqatar naqty mindet júktedi.
