Mundaı oblystyq deńgeıdegi iri jarystyń ótýi osy aýdannyń tarıhynda birinshi ret bolyp otyr. Amangeldi aýylyndaǵy jabyq júzý basseıni 2021 jyly paıdalanýǵa berilgen. Sodan beri jaz boıy ózen jaǵasynan shyqpaıtyn oıyn balasy qysy-jazy arnaıy jattyqtyrýshynyń tárbıesinde bolyp, sý sportymen shyndap aınalysýǵa múmkindik alyp otyr. Osynyń nátıjesinde aýdannyń jas sportshylary byltyrǵy oblys birinshiliginde estafetalyq júzý jarystarynan júldeli úshinshi orynǵa ıe boldy.
Bul basseındi kásipker Sapar Ysqaquly 125 mln teńgege salyp berdi. Qazirgi tańda 70-ke tarta bala júzýmen shuǵyldanady. Shtatta 13 adam jumys isteıdi, eki bapker bar. Júzý kesheni oblys bıýdjetinen qarjylandyrylady. Balalar eki jyldyń ishinde sýǵa júzýmen kásibı túrde aınalysyp, búginde úlken jarystarǵa qatysýǵa jarap qaldy. Mundaı zamanaýı júzý kesheni basqa aýdandarda joq.
Halyqaralyq standartqa saı zamanaýı jabdyqtalǵan jabyq basseınde uzyndyǵy 100 metrlik tórt júzý jolaǵy bar. Bapkerdiń aıtýynsha, balanyń neǵurlym uzaqqa júzip jattyqqany jaqsy. О́ıtkeni mundaı basseınde shynyqqan bala úlken jarystarda entikpeıdi.
Oblys kóleminde júzý jolaǵynyń uzyndyǵy 100 metrge deıin jetetin sý sporty kesheni Qostanaı qalasy men osy Amangeldi aýylynda ǵana bar ekenin aıta ketý kerek.
Batyr toıy aıasyndaǵy oblystyq chempıonatqa Amangeldi aýdanynyń jas júzýshileri men osy sport túri damyǵan Qostanaı, Rýdnyı, Lısakov sııaqty qalalardan kelgen sportshylar qatysty. Qalada jattyqqan baby myqty jas sportshylardan qalyspaı, júldeli oryndarǵa iligip jatqan aýyl balalarynyń talaby jan súısintedi.
Qostanaı oblysy
