Foto: kaz.nur.kz
Tarazdaǵy perzenthanadan Naızabekovtar otbasy shańyraqtaryna úlken qýanyshpen oraldy. Bir emes úsh birdeı qyzdyń ákesi atanǵan Nurbol Naızabekov – memlekettik qyzmetker. Merki aýdany ákimi apparatynyń memlekettik-quqyqtyq bóliminde bas ınspektor bolyp qyzmet atqarady. Al anasy − Gúljan Ábdibaeva №17 I.Trýbısyn atyndaǵy jalpy bilim beretin mektep-gımnazııasynda aǵylshyn tili pániniń muǵalimi.
Úshem qyzdar merziminen buryn, ıaǵnı júktiliktiń 33-aptasynda dúnıege kelgen. Olardyń biriniń salmaǵy 2 490 gramm bolsa, ekinshisi − 2 300, úshinshisiniki 2 700 gramǵa jetken. Sheksiz qýanyshqa kenelgen otbasy qyzdarynyń esimderin Aıana, Aısha, Aıla dep qoıypty. Gúljan Ábdibaevanyń aıtýynsha, áýletterinde kúıeýi men óz jaǵynan da egizder bar.
«29 tamyzda dárigerler júktiligimniń 33-aptasynda josparly túrde kesar tiligimen bosandyrdy. Qatty qınalmadym. Operasııa sátti ótti. Qyzdarym shala týǵandyqtan demalýy qıyndap, jansaqtaý bólimine jatqyzyldy. Ertesine balalarym neonatologııa bólimine aýystyryldy. 3-4 kúnnen keıin deneleri sarǵyshtanǵan soń, sáýle terapııasyn qabyldadyq. Dárigerlerge raqmet, jaqsy qarady. Qyzdarymnyń jaǵdaıy jaqsarǵan soń eki aptadan keıin ǵana úıge shyqtyq», dedi úshemniń anasy.
