Alataý bókterinde ótken saltanatty is-shara barysynda Vladımır Smırnov, Ermahan Ybyraıymov, Olga Shıshıgına jáne Aleksandr Vınokýrov UOK-tyń ordenimen marapattaldy. Bul esimniń barlyǵy da jankúıerlerge etene tanys. Máselen, V.Smırnov – táýelsiz Qazaqstan sporty tarıhyndaǵy tuńǵysh Olımpıada chempıony. Bul ataqqa ol 1994 jyly Lıllehammerde alaýy tutanǵan qysqy oıyndarda qol jetkizdi. Sol kezde dańqty shańǵyshymyz 50 shaqyrymdyq qashyqtyqta aldyna jan salmaı, Skandınavııa túbeginde Qazaq eliniń ánuranyn shyrqatty. Odan bólek, Vladımır Olımpııa oıyndarynda taǵy 4 kúmis pen 2 qolany oljalap, álem chempıonattarynda 11 (4 altyn+4 kúmis+2 qola) ret jeńis tuǵyryna kóterildi.
Boksshy E.Ybyraıymov – Sıdneı Olımpıadasynyń jeńimpazy, Atlanta Olımpıadasynyń qola júldegeri. Jýan judyryqty jigitimiz 1997 jyly Býdapeshttegi álem chempıonatynyń fınalynda kúsh synassa, 1999 jyly Hıýstonda qola medaldi moınyna ildi. Jelaıaq O.Shıshıgına – Sıdneıde ótken Olımpııa oıyndarynda altynnan alqa taǵyp, dúnıejúzilik dodada eki ret júldegerler sanatyna qosyldy. Veloshabandoz A.Vınokýrov ǵasyrlar toǵysynda Olımpıadanyń kúmisine qol sozsa, 2012 jyly Londonda jeńis tuǵyrynyń eń bıik satysyna kóterildi.
Esimderi joǵaryda atalǵan sańlaqtardan bólek, Jandos Kókimov, Málik Nádirbekov, Músilim Daıyrbekov, Amankeldi Rymqulov, Tursynǵalı Edilov, Iýrıı Gýskov, Vadım Prısıajnıýk, Alekseı Kazakov, Elena Hrýstaleva, Dmıtrıı Balandın jáne taǵy basqa mamandar men bapkerler, sportshylar UOK-tyń medalin keýdesine taqty. Marapattalǵandardyń qatarynda Eseı Jeńisuly, Galına Mýlenkova, Galına Polevaıa jáne Sergeı Raılıan sekildi ózimizdiń áriptes-jýrnalıster de boldy.
