«Damý» qorynyń Atyraý oblystyq fılıaly dırektorynyń orynbasary Ernar Jumaǵalıevtiń málimetinshe, 2013 jyly bıznesti qoldaý jáne damytý baǵdarlamalary iske qosylǵannan beri nesıe somasy 255,2 mlrd teńge bolatyn 4 047 jobaǵa sýbsıdııa berilgen. Kásipkerlerdiń 3 276 jobasy «Damý» qorynan 35,4 mlrd teńgeniń kepildigin alǵan. Mundaǵy nesıe somasy 71,8 mlrd teńgeni quraıdy.
«Kásipkerlerdiń «Paıyzdyq mólsherlemeni sýbsıdııalaý» baǵytymen 23,9 mlrd teńgeden asa qarjyny quraǵan 428 jobaǵa qoldaý kórsetildi. «Kásipkerlikti damytý jónindegi 2021-2025 jyldarǵa arnalǵan ulttyq joba» sheńberinde nesıe somasy 14,4 mlrd teńgeden asa 425 joba bar. Al «Qarapaıym zattar ekonomıkasy» basym jobalaryn nesıeleý tetigimen quny 9,5 mlrd teńgeden asatyn 3, «Kepildendirý» baǵytymen 11,9 mlrd teńgeniń 388 jobasyna qoldaý jasaldy. Kásip ashqan kásipkerlerdiń jobasyna berilgen kepildik somasy 5,8 mlrd teńgeni qurady», deıdi E.Jumaǵalıev.
Máselen, Ulbolsyn Erýbaeva «Rıza» jeke kásipkerligin quryp, nemis tehnologııasymen nan ónimderin pisirýdi qolǵa alǵan. Bul úshin Germanııada shyǵarylǵan «Býlkı-Haýz» naýbaıhanasynyń jabdyǵyn satyp, jalǵa alǵan orynǵa ornatqan. Árıne, ózge eldiń tehnologııasyn ıgerý ońaı emes. Sol sebepten áýeli sheteldik tehnologııamen nan pisirý ádisin zerttep, keıin bashqur aspazdarynan keńes alǵan.
«Meniń kásibim ǵımaratty jaldaýmen bastaldy. Jeke ǵımarat satyp alýǵa múmkindigim bolmady. О́ıtkeni serebraldy sal aýrýyna shaldyqqan balam bar. Oǵan udaıy emdik kýrs alý qajet. Ony udaıy qoldaý úshin álsizdik tanytpaýǵa bekindim. Qazir eki jeke aspazdyq dúkenim jumys istep tur», deıdi U.Erýbaeva.
Qazir onyń aspazdyq dúkenderinde nan ónimderiniń 30 túri pisiriledi. Tutynýshyǵa tátti jáne nirlendirilgen ónimderdiń 100 túrin usynady.
«Bankten alǵan nesıeme «Bıznestiń jol kartasy – 2025» memlekettik baǵdarlamasy arqyly jyldyq mólsherlemesi 14 paıyzdyq sýbsıdııaǵa ıe boldym. Qazir 6 paıyzyn ǵana tóleımin. Aıyrmasyn memleket sýbsıdııalaıdy. «Damý» qorynyń kepildigi nesıe somasynyń 85 paıyzyn quraıdy. Bul – bizge úlken qoldaý», deıdi U.Erýbaeva.
Osyndaı demeýdi sezinip otyrǵan kásipkerdiń qatarynda Gúlbaný Ǵaıdarova da bar. Ol ulttyq naqyshtaǵy toı kıimderiniń salonyn ashqan.
«Meniń negizgi mamandyǵym – bastaýysh synyptardaǵy aǵylshyn tili pániniń muǵalimi. Alaıda eńbek jolymdy bastar sátte aldymda eki tańdaý turdy. Biri – mamandyǵymmen jumysqa ornalasý, ekinshisi – toı kóılekteriniń salonyn ashý. О́ıtkeni bala kezimnen qýyrshaqtarǵa aq matadan qalyńdyqtyń kóılegin tikkendi unatýshy edim», deıdi G.Ǵaıdarova.
Bir qyzyǵy, óziniń toıynda kıgen qalyńdyqtyń kóılegi men sáýkeleni satyp almaǵan. Ekeýin de ózi tikken. Buǵan, árıne, týystary men dostarynyń bári tańdanys bildiripti.
«Osydan keıin ulttyq naqyshta kıim tigetin sheberhana ashýǵa bel baıladym. Qazir «Syrǵa salý», «Qyz uzatý» saltanatyna tapsyrys kóp túsedi. 11 jyldan beri ulttyq kıimderdi tigýdi kásip etip kelemin. Atyraý, Aqtaý, Oral jáne Aqtóbe qalalarynan toıǵa arnalǵan kıimderdiń salonyn ashtym. Kásibimdi órkendetýge «Damý» qory arqyly ıe bolǵan 14 paıyzdyq sýbsıdııanyń kómegi tıip tur. Qor 30,1 mln teńgege kepildik berdi. О́zim banktik mólsherlemeniń 5 paıyzyn tóleımin», deıdi G.Ǵaıdarova.
Qordyń kepildigimen isin jandandyryp otyrǵan Laýra Qusmanova da Atyraý qalasynyń eki shaǵyn aýdanynan «Altyn saqa-1», «Altyn saqa-2» balabaqshasyn ashqan. Qazir eki balabaqshaǵa 350-ge jýyq bala baryp júr. Ǵımarattar qajetti qural-jabdyqtarmen, jıhazdarmen, turmystyq tehnıkamen, oıyn alańdarymen jabdyqtalǵan. Balalarǵa bes mezgil tamaq beriledi. Olarǵa mektepke deıingi sabaq qazaq jáne orys tilinde «Qarlyǵash», «Zerek bala» oqý josparymen júrgiziledi.
Endi kásipker kásibin keńeıtip, oqý-shyǵarmashylyqty baǵytty ustanatyn sport ortalyǵyn ashýǵa bel baılapty. Munda sporttyń túr-túri men bıge, aspaptyq jáne aqparattyq tehnologııaǵa baýlıtyn úıirmeler ashylady.
Al «Grant med group» JShS stomatologııalyq emhanany ashýdy qolaı kóripti. О́ıtkeni keıingi jyldary medısınanyń bul qyzmetine júginetinder kóbeıgen. Sol sebepten «Damýdyń» demeýimen qyzmetin bastaǵan jańa ınnovasııalyq emhananyń turaqty kelýshiler shoǵyry qalyptasqan.
Atyraý oblysy
