Foto: Úkimettiń baspasóz qyzmeti
Premer-mınıstrge «MAEK» JShS bas dırektory Jasulan Súıinshalıev kásiporynnyń aǵymdaǵy daıyndyǵy jáne ony odan ári jańǵyrtý josparlary týraly baıandady. MAEK – birtutas energetıkalyq jáne sý óndirýshi keshen, onyń negizgi mindeti – Mańǵystaý jáne Atyraý (ishinara) oblystaryn elektr energııasymen, al, Aqtaý qalasyn jylý energııasymen, aýyzsýmen, ystyq jáne tehnıkalyq sýmen qamtamasyz etý. Mundaǵy tótenshe jaǵdaılarǵa alyp kelip otyrǵan negizgi qural-jabdyqtardyń tozýy 80%-dan asady.
Bıyl kásiporynnyń óz qarajaty esebinen týrboagregattarǵa, qazandyq agregattaryna jáne qosalqy jabdyqtarǵa kúrdeli jóndeý jumystary júrgizilip jatyr. Ábden tozyǵy jetken qurylǵylardy aýystyrý úshin Mańǵystaý oblysy ákimdiginiń rezervinen 2,6 mlrd teńge bólindi. Sonymen qatar Premer-mınıstrdiń tapsyrmasy boıynsha jańa jabdyqtar men qosalqy bólshekter satyp alýǵa Úkimet rezervinen taǵy 4,9 mlrd teńge bólindi. Qazirgi ýaqytta jabdyqtardy jetkizýshilermen kelisimsharttar jasaldy, olar osy jyldyń qarasha-jeltoqsan aılarynda jetkiziledi.
Álıhan Smaıylovqa JEO jabdyǵynyń edáýir tozýyna baılanysty 2024 jyly №3 energoblokty ishinara jańǵyrtý arqyly kúrdeli jóndeý jumystary josparlanǵany týraly baıandaldy. Sondaı-aq 2025 jyly №2 energoblokty jáne 2026 jyly №1 energoblokty tolyq jańǵyrtý arqyly kúrdeli jóndeý júrgizý josparlanǵan. Jylý elektr ortalyǵynyń bas ǵımaratyndaǵy aıaqtalmaǵan qurylys alańynda №4 energoblok salý josparlanyp otyr. Qurylys alańyna barlyq qajetti ınjenerlik kommýnıkasııalar tartylǵan. Iske asyrý merzimi – 2027 jyldyń 4-shi toqsany. Jalpy, qoldanystaǵy energobloktardy jańǵyrtý jáne jańalaryn salý esebinen generasııa tutastaı alǵanda 420 MVt-qa artady dep kútiledi.
Bul rette, eki sý jylytý qazandyǵynyń qurylysy men 1-JEO-degi №7 qazandyq agregatyn, sondaı-aq №10 qazandyq agregatyn jańǵyrtý jáne 2-JEO-daǵy №7 týrboagregatty kondensatorlyq týrbınaǵa aýystyra otyryp qaıta jańartý syndy jobalar boıynsha qazirgi tańda tehnıkalyq qujattar daıyndalyp, Memlekettik saraptamanyń oń qorytyndysy alyndy. Búginde jobalyq-smetalyq qujattamany ázirleý boıynsha konkýrstyq rásimder júrgizilip jatyr.
Premer-mınıstr apatty jaǵdaıdaǵy jabdyqty aýystyrý kombınattyń tehnıkalyq jaǵdaıyn jaqsartyp, jumys qabiletin arttyrýǵa múmkindik beretinin atap ótti. Iаǵnı, generasııalyq qýat kózderiniń óship qalýy jáne tutynýshylar úshin shekteýlerdi engizý sııaqty táýekelder barynsha azaıady.
«Oblys ákimdigi jóndeý jumystarynyń ýaqtyly aıaqtalýyn baqylaýdy qamtamasyz etýi qajet», dedi ol.
Budan ári Úkimet basshysyna «Kaspıı» sý tushytý zaýyty» JShS dırektory Nurlybaı Aqqulov zaýyt ónimdiligin táýligine 40 myń tekshe metrge jetkizý jumystary týraly baıandady.
Nysandy jańǵyrtýǵa memlekettik bıýdjetten 12 mlrd teńgeden astam, al Úkimet rezervinen – qosymsha 5 mlrd teńgeden astam qarjy bólinip, qazirgi tańda joba boıynsha qurylys jumystary 90%-ǵa oryndaldy. Sondaı-aq zaýytta jańa sorǵy qondyrǵylary, sýdy aldyn-ala tazartý súzgileri, sýdy mıneraldandyrýǵa arnalǵan súzgi-kondısıonerler, aralastyrý kameralary, elektr jelileri men transformatorlyq qosalqy stansalar ornatylǵan.
Álıhan Smaıylov Munaıly jáne Qaraqııa aýdandarynyń eldi mekenderi úshin aýyzsýdyń negizgi kózi dál osy zaýyt bolyp otyrǵanyn atap ótti. Qazir onyń qýaty táýligine 20 myń tekshe metrdi quraıdy. Ol 180 myńnan astam adamdy sýmen qamtamasyz etedi.
«Halyqtyń jyl saıynǵy ósimin, sondaı-aq Kaspıı teńiziniń jaǵalaýynda týrıstik klasterdiń damýyn eskere otyryp, aýyzsý óndirisin ulǵaıtý máselesi asa ózekti. Osyǵan baılanysty Prezıdent «Kaspıı» tushylandyrý zaýytyn táýligine 40 myń tekshe metrge deıin keńeıtý jobasyn iske asyrýdy tapsyrdy. Úkimet tarapynan qajetti qarjylyq qoldaý kórsetildi. Oblys ákimdigine osy jobany aǵymdaǵy jyldyń sońyna deıin aıaqtaý qajettigin taǵy da eske salamyn, jańa jyldan bastap halyq sýmen qajetti kólemde qamtamasyz etilýi tıis», dedi Premer-mınıstr.
