Foto: https://www.akorda.kz/
Kezdesýde Qazaqstannyń temirjol salasyn jańǵyrtý aıasynda Wabtec kompanııasymen aradaǵy yntymaqtastyq perspektıvalary talqylandy.
Rafael Santana Qasym-Jomart Toqaevqa Qazaqstanda sýtegi tehnologııasyn qoldanatyn lokomotıvter men olardyń qosalqy bólshekteriniń óndirisin iske qosý, ınjırıng ortalyǵy men tehnologııalyq transfertti uıymdastyrý úshin pysyqtalyp jatqan ınvestısııalyq jobalar týraly málimet berdi.
Memleket basshysy kompanııanyń kólik-logıstıka salasyna shamamen 1 mıllıard dollar ınvestısııa quıý josparyn quptap, munyń Transkaspıı halyqaralyq kólik baǵdaryn damytýǵa yqpal etetinin jáne basqa da ınfraqurylymdyq jobalar úshin negiz bolatynyn atap ótti.
Prezıdenttiń AQSh-qa sapary aıasynda «Qazaqstan temir joly» «UK» aksıonerlik qoǵamy men Wabtec arasynda strategııalyq yntymaqtastyq týraly negizdemelik kelisimge qol qoıyldy.
Wabtec (Westinghouse Air Brake Technologies Corporation) Fortune 500 tizimine kiredi, sondaı-aq ol kólik-logıstıka salasyndaǵy jahandyq kóshbasshylardyń biri sanalady.
Aıta ketý kerek, AQSh-tyń áıgili kompanııasy álemniń 50-den astam elinde fılıaldaryn ashyp, 27 myńnan asa adamdy turaqty jumyspen qamtyp otyr.
