Ekibastuz – rekordshylar shahary. Tek óndiris aýmaǵyn ǵana alatyn bolsaq, álemdegi eń iri kenish pen eń bıik óndiristik murja osynda ornalasqan. №2 MAES-tiń zeńgir kókpen ushtasqan murjasynan qashan qarasańyz da býdaq-býdaq tútin shyǵyp jatady. Mundaǵy qos energoblok jylyna kemi 6 mlrd saǵat elektr qýatyn óndirip, respýblıkadaǵy elektr energııasynyń 6-7 paıyzyn qamtamasyz etip otyr. 2021 jyly kásiporyn óziniń altyn tarıhynda buryn-sońdy tirkelmegen rekordtyq kórsetkishke qol jetkizip, el ıgiligi úshin 6,4 mlrd saǵat elektr energııasyn berdi.
Iri aýqymdaǵy mundaı óndiristik kórsetkishterdi baǵyndyrý eń áýeli kásiporyndaǵy orta býyn qyzmetkerlerdiń arqasy ekeni aıtpasa da túsinikti. Stansada búginde 1 500-den asa adam eńbek etedi. Sonyń ishinde Seıitjanov áýleti erekshe atalady. Áýlettiń úlkeni Qabıden Omarǵalıulynyń bul eńbek uıymyndaǵy ótili 29 jyldan asqan. Al aǵamyzdyń qosaǵy, qazandyq jabdyqtary boıynsha mashınıst-aralaýshy Galına Neǵmatqyzy qýat óndirý salasyna 30 jyl eńbek sińirgen.
– Aımaqtyq elektr stansasynda basqarý pýltindegi bloktik júıeniń mashınısi retinde eńbek etemin. Negizi sonaý Atbasar eliniń týmasymyn, 1994 jyly osy jaqqa qonys aýdaryp keldik. Alǵan bilimim energetıka salasyna qatysty bolǵan soń kóp oılanbastan MAES-2-ge jumysqa turdym. Qyzyq bolǵanda, bizdiń áýlettiń músheleriniń barlyǵy jyldar óte energetıka salasyna áýes bolyp shyqty, – dep jymıdy Q.Seıitjanov. – Tek óz otbasymnan úıdegi jeńgeń shırek ǵasyrdan asa qazandyqta mashınıst qyzmetin atqarsa, úlken ulym Nursultan bloktik júıede aǵa mashınıst bolyp eńbek etip keledi. Ulym ekeýimiz – 8-razrıadty qyzmetkermiz. Kishi ulym Jolaman jylý avtomatıkasynda sheber, al kenje qyzym qazir Almatyda energetıka salasy boıynsha magıstratýrada bilim alyp jatyr. Buıyrsa, ol da elimizdiń qýat óndirý salasyn damytýǵa óz úlesin qosady dep úmittenip otyrmyz. Budan bólek, týǵan aǵam Muhıtden Seıitjanov, ózge baýyrlarymnyń balalary, jıenderimiz ben kelinderimiz stansanyń kórigin qyzdyryp, el halqyn qýatpen qamtamasyz etý úshin irkilissiz jumys isteýde. Jalpy, Seıitjanovtar áýletinen bul kásiporynda 11 adam barmyz.
Bul áýletten shyqqan Erlan Ǵalıasqarulynyń kásiporynda – 25, Gúlbarshyn Rahymberdiqyzy – 21, Ásel Saılaýqyzy – 16, Mahabbat Maratqyzy – 8, Dýman Ermekuly – 4, Aıgerim Qasymhanqyzynyń 2 jyldyq eńbek ótili bar. Al 16 jyl tapjylmaı eńbek etken Temirlan Seıitjanov qazirgi kúni jylý avtomatıkasy sehynda basshynyń orynbasary laýazymyna jetken. Áriptesteri aınalasyna syıly, árdaıym kóńildi júretin Temirlannyń eńbegin erekshe baǵalaıdy. Ol kásiporyndaǵy kóńildi tapqyrlar klýbynyń kapıtany, kásiporyn qyzmetkerleri balalarynyń demalysyn qyzyqty uıymdastyrýda odan asqan sheber joq deıdi birge jumys isteıtinder.
«Elimizdiń energetıka júıesi sanalatyn Ekibastuzda, osyndaı alyp óndiriste jumys isteý – bizdiń áýletimiz úshin úlken abyroı. Sonaý 90-jyldary toqyraý kezeńin bastan ótkerip, elmen birge talaı qıyndyqty kórdik. Qýat jetispeýshiligi saldarynan óńirlerdegi jaryqty kezegimen ajyratyp, táýliktiń bir mezgilinde ǵana jaryq janyp turatyn ýaqyt boldy. Qazirgi kúni ol qıyndyqtar umytylyp, qalalarymyz ben aýyldarymyz, úlken joldardyń boıy túnde samaladaı jarqyrap turatyny kóńilimizge qýanysh uıalatady. Biz sııaqty qarapaıym energetıkter ár otbasynyń shańyraǵyna jetip turǵan jaryqty maqtanysh, óz eńbegimizdiń nátıjesi sanaımyz. Túptep kelgende energetıka salasy táýelsiz Qazaqstannyń negizgi ekonomıkalyq sektoryna aınalyp otyr. Buıyrsa, jaqyn jyldary №2 MAES-te úshinshi energııalyq blok salynyp, eldegi elektr qýatynyń jetispeýshiligin eńseremiz. Jańa blok ornalasatyn oryn áldeqashan daıyn, tek montajdaýshy áriptesterimiz 625 megavattyq qazandyqtyń jetkizilýin kútip otyrǵan jaıy bar. Al bulardyń kidirissiz jumys isteýi úshin bizdiń de arqalaıtyn jaýapkershiligimiz jeterlik», dep áńgimesin tarqata tústi Qabıden aǵa.
Elektr stansasynda arnaıy dabyl qaǵylyp, basqarý pýltindegi qyzmetkerlerdiń kez kelgen jaǵdaıǵa daıyndyǵy tekseriledi. Basqarý pýltindegi bloktik júıeniń barlyǵy kompıýterge jalǵanǵan demeseńiz, energııalyq bloktardaǵy árbir kórsetkish pen normalardy táýlik boıy tapjylmastan baqylap, teńgerimin saqtaý naǵyz mamandardyń ǵana qolynan keletini shyn. Al Qabıden Omarǵalıuly sııaqty bilikti mamandar júıeniń árbir qadamyn dóp basyp, óndiristegi qos «alyp júrektiń» lúpilin qalypty etýge ólsheýsiz úles qosyp otyr.
Áýlet úlkeniniń pikirinshe, otandyq qýat óndirisiniń ósýimen qatar, saladaǵy qyzmetkerlerdiń áleýmettik jaǵdaıyna memleket basa nazar aýdarǵany abzal. Eń bastysy, jalaqy deńgeıi durys bolyp, sapaly mamandardy ustap qalýǵa basymdyq berilse deıdi.
«Memleket basshysy Qasym-Jomart Toqaevtyń bastamasymen búginde eńbek adamdaryn qurmetteýge mańyz berilip otyr. Prezıdentimiz Ádiletti Qazaqstanda qarapaıym eńbek adamdaryna erekshe qurmet kórsetiletinin, barlyq jetistiktiń bastaýy adal eńbek pen iskerlik ekenin talaı márte aıtty. Elimizdiń aldynda ekonomıkalyq jáne áleýmettik úlken ózgerister turǵany baıqalady. Osy maqsat jolyndaǵy barlyq bastamaǵa qarapaıym eńbek adamdary tirek bolatyny anyq. Al búgingi ómirsheń jobalarymyzdy ósip kele jatqan urpaq jalǵastyrady. Meniń balalarym men nemerelerim mártebeli mamandyqty ári qaraı ıgerip, salanyń baǵyn jandyra beretinine senimdimin. Jastarymyz árdaıym jasampazdyq pen jańashyldyqqa umtylsa, jaman bolmaıdy», deıdi qurmetti energetık.
Aıtyp óteıik, Qabıden Omarǵalıuly el Táýelsizdiginiń mereıtoılyq medaldarymen, salalyq Qurmet gramatolarymen marapattalǵan. Áýlettiń ózge músheleri de laıyqty marapat-syılyqtan kende emes. Seıitjanovtardyń tynymsyz tirligi eldegi energetıka salasyna qomaqty úlesin qosýda dep qabyldaǵan durys. Áýlettiń árbir múshesi qýat óndirý salasynyń zeınetin kórip, berekeli ǵumyr keshsin deımiz.
Pavlodar oblysy,
Ekibastuz qalasy
