«Almaty oblysynda dástúrli túrde dándi daqyldar jáne alma, almurt, júzim, kókónisterdiń barlyq túri ósirilip, mal men qus sharýashylyǵy qarqyndy damyǵan. Bıylǵy jyly respýblıkada sary órik ósirý boıynsha 1-oryndy, kartop pen kúrish ósirý boıynsha 2-oryndy alyp otyr.
Sondaı-aq óńirimiz qus ósirý men qus etin óńdeý boıynsha aldyńǵy orynda. Oblysta 8,3 mln bas qus tirkelgen, ıaǵnı respýblıka boıynsha jalpy qus sanynyń 17 paıyzyn quraıdy. Jyl basynan beri 141,4 myń tonna barlyq túrdegi et óndirildi. Onyń ishinde 62,1 myń tonnasy broılerdiń qus eti. Oblys qus etine degen Almaty qalasy turǵyndarynyń suranysyn 100 paıyz qamtamasyz etip otyr», deıdi oblys ákiminiń orynbasary Almas Batanov.
О́ńirdiń alys-jaqyn Raıymbek, Kegen, Uıǵyr, Balqash, Jambyl, Eńbekshiqazaq, Talǵar, Qarasaı, Ile aýdandarymen qatar, Qonaev qalasynyń aýylsharýashylyq taýar óndirýshileri bul kúni jármeńkege jalpy kólemi 179,3 tonna ónim alyp keldi. Onyń ishinde 20,3 tonna et ónimderi, 6 tonna sút ónimderi, 20,6 tonna kartop, 25,4 tonna kókónis, 22 tonna alma men jemis-jıdek jáne 45,2 tonna basqa da ónimder saýdalandy.
«Mundaı iri jármeńkege alǵash ret óz ónimimdi alyp keldim. Tabıǵı baldyń úsh túri saýdalanady. Dámin tatqan tutynýshylar dán rıza keıippen satyp alyp jatyr. О́nimderimizdi ótkizýde jármeńkeniń paıdasy tııýde», deıdi Kegen aýdanynan kelgen jas omartashy Igilik Ábdirásil.
Al jeksenbi kúni Almaty qalasy ákimdiginiń uıymdastyrýymen Tuńǵysh Prezıdent saıabaǵynda «Apple Fest» festıvali ótti. О́ńirde 11 myń gektarǵa jýyq alma baǵy bar bolsa, onyń ishinde áıgili aport 1 259 gektardy quraıdy.
Atalǵan alma festıvaline Talǵar, Qarasaı, Eńbekshiqazaq jáne Uıǵyr aýdandarynyń shamamen 25 baý-baqsha seriktestikteri qatysty. Jármeńkede almanyń joǵary surypty 13 túri usynyldy.
Almaty oblysy
