Ekologııalyq naýqannyń negizgi maqsaty kıeli jerlerdi tazartý, jastardy týǵan óńirlerin aıalap, súıýge baǵyttalǵany málim. Bul kúni oblys ortalyǵynan «Jasyl el» jastardyń eńbek jasaǵy óńirlik shtabynyń sarbazdary, Á.Marǵulan atyndaǵy Pavlodar pedagogıkalyq ýnıversıteti stýdentteri jáne Qazaqstan stýdentteri alıansy múshelerinen quralǵan arnaıy jasaq 220 shaqyrym jerdegi Baıanaýyl aýdanyna baryp, ondaǵy Sabyndykól kóliniń mańaıyn kúl-qoqystan tazartty.
«Jasyl el» óńirlik shtabynyń komandıri Rýsana Samekovanyń aıtýynsha, ekologııalyq aksııaǵa aýdan turǵyndary da ún qosyp, jastarmen birge sý aıdyny mańaıyn retke keltirgen.
– Aksııa nátıjesinde kól mańaıynan 50 qapshyq qoqys shyǵarylyp, aýmaq tazara tústi. Qorshaǵan ortany kózimizdiń qarashyǵyndaı saqtaý úshin bizge mundaı isterge júıeli jumylýymyz qajet ekenin qatysýshylar túsingendeı. Jalpy Ertis-Baıan óńiriniń jastary ekologııalyq jobalardy belsendi qoldaıdy jáne týǵan ólkesiniń tazalyǵy men sulýlyǵyn saqtaýǵa árdaıym óz úlesin qosýǵa tyrysyp júr. Aımaǵymyzdyń barlyq turǵynyn ásem tabıǵatymyzdy qorǵaýǵa, aǵa býynnyń bizge amanattap ketken tabıǵı baılyǵyn saqtaýǵa shaqyramyz. Aksııa aldaǵy ýaqytta jalǵasady. О́ńirdegi kıeli jerlerdi, kórikti mekenderdi tazalap, kelýshiler úshin qolaıly ete túsý – mindetimiz, –deıdi ol.
Jasaq sarbazy Sultan Sarımov tazalyq is-sharasyna qatysa otyryp, jastar tabıǵatty qorǵaýdyń mańyzyn tereń túsine bastaıdy degen pikirde. «Tabıǵattaǵy kórkemdik óte názik nárse ekenin endi bilip jatyrmyz. Onyń tutastyǵyn saqtap, artymyzdan ergen ini-qaryndastarymyzǵa izgi isterimizben úlgi bolý kerekpiz. Árbir laqtyrǵan kámpıt qaǵazy, tıtteı ǵana turmystyq zattar jer bederin lastap qana qoımaı, ásem tabıǵatqa nuqsanyn keltiredi. Aınalamyz árdaıym taza, jap-jasyl bolyp turýy úshin eń áýeli qoqys tastamaýdy úırenýimiz kerek», deıdi belsendi jas.
Jalpy qyrkúıektiń úshinshi senbisinde álemniń kóptegen elinde «World clean up day» dástúrli senbiligi uıymdastyrylatyny málim. Otandyq ekologııalyq aksııa osy aýqymdy is-sharaǵa oraılastyrylǵany kezdeısoq emes. Bul kúni Pavlodar qalasyndaǵy Ýsolka yqsham aýdany men «Qazqonaq» tabıǵı eskertkishiniń mańaıy da umyt qalmady. Ýsolka ózeniniń mańaıy – shahar turǵyndary men qonaqtar jıi serýendeıtin aýmaq. Sý aıdynynyń aınalasynda tamasha tabıǵat qoınaýy ornalasqan, jaǵalaýy tolǵan toǵaı. О́kinishke qaraı, tabıǵat aıasyna shyqqandar tamaq qaldyqtary men polıetılen qapshyqtaryn, túrli qoqystar qaldyryp ketedi. Sondyqtan aımaq jastary bul jerdi únemi tazartyp turady. Bul kúni memlekettik uıymdar men iri kásiporyndardyń qyzmetkerleri, ýnıversıtetter pen kolledjderdiń stýdentteri, eriktiler men qoǵamdyq birlestikterdiń ókilderi tazalyq sharalaryna jumyldy. Sanaýly saǵat ishinde 300-den astam qatysýshy 20 tonna qoqys jınady. Oblysy boıynsha ekologııa departamentiniń memlekettik ekologııalyq ınspektory Baýyrjan Janseıitov atap ótkendeı, mundaı aksııanyń nátıjesinde adamdar tabıǵatpen jaqyndasyp, ony aıalaýǵa úırenedi. «Ekologııalyq tárbıe qorshaǵan ortaǵa degen súıispenshilik arqyly qalyptasady. Al tabıǵatqa qamqorlyq jasaý osyndaı senbilikterde baıqalatyny ras. Kópshilik tize qosyp, lastanyp ketken jerlerdi qoqystan tazartyp, retke keltiredi. Osyndaı jumystar barysynda qorshaǵan álemdi tanýǵa degen qyzyǵýshylyq paıda bolyp, ekologııalyq mádenıetti nasıhattaý múmkin bolady», deıdi ol.
Pavlodar oblysy
