Is-sharany júrgizip otyrǵan Memlekettik syılyqtyń laýreaty, belgili jýrnalıst Saýytbek Abdrahmanov Sharhan Qazyǵuldyń romanyn otandyq kórkem shyǵarmadaǵy jańashyldyq retinde joǵary baǵalady. Atap aıtqanda, shyǵarmadaǵy lokasııa baılyǵyna toqtalyp, Ábdijámil Nurpeıisovtiń «Qan men terindegideı» tirshilik negizi sýdan bastap, Qazaqstan dalasynan órbigen oqıǵa Aýǵanstan, odan qurlyq asyp Amerıkada jalǵasyp, týǵan elge oralǵan qazaqtyń jan azaby men taǵdyr-talaıy arqyly jazýshy HH-HHI ǵasyrdaǵy úsh býyn ókiliniń ýaqyt keńistigin qamtyǵan. «Roman áleýmettik fılosofııalyq shyǵarmaǵa kelińkireıdi. Eń basty nárse, týyndy qazaqtyń rýhyn kóteredi», dedi Saýytbek Abdrahmanov.
«Shyǵarmanyń ataýy aıtyp turǵandaı, adam balasyn tolǵandyratyn máńgilik suraqtar jan azabynan týady. Týǵan topyraǵy Aralǵa 37 jyldan soń oralǵan Ábý kúresker rýhynyń arqasynda azamat bolyp ósip-jetilgenin kórgen ákesi Erdenniń qaısar da asqaq beınesi súısindiredi. Jan tolǵanysynan týyndaıtyn suraqtardyń jaýabyn osy ákeli-balaly jandar taǵdyrynan, ómirdiń mánin júrek, sanamen túısingen áreket-tanymynan tanýǵa bolady», dedi qoǵam qaıratkeri, qalamger Mádı Aıymbetov.
Jazýshy-dramatýrg Roza Muqanova «Kúlpet» romany qazaq qoǵamynda aıtýly oqıǵalardyń biregeıi bolǵany ras. Eshkimdi qaıtalamaıdy. Janyn jegen keıipker arpalysy, ol arpalys kúızeliske emes, erkindikke, adam janynyń azattyǵyna umtyldyrady» dep avtordyń birden roman jazyp shyqqan batyldyǵyn úlgi etti.
«Kúlpet» kitabyna redaktorlyq etken fılologııa ǵylymdarynyń doktory, akademık Sherýbaı Qurmanbaıuly, Senat depýtaty Nurtóre Júsip, Májilis depýtaty Ermurat Bapı, ádebıet synshysy Amangeldi Keńshilikuly shyǵarmanyń ár qyryna toqtalyp, súbeli pikir aıtty.
«Meniń oıymsha, áli de tereńdete túsetin tustar bar. Máselen, Ábý men Ásel ekeýi arasyndaǵy mahabbatty tereńdete túsý kerek. Taqyryp tyń, qazaq ádebıeti úshin jańa taqyryp. Avtor sıtýasııa týdyra bilgen. Artyqshylyqtarymen qatar, áli de bolsa shıratatyn jerleri bar», dedi synshy Amangeldi Keńshilikuly.
