Uıymnyń róli aıryqsha

Kezdeısoq daǵdarystar men júıeli qıyn­dyq­tarǵa qaramastan, BUU jáne onyń agenttik­teri halyqaralyq qatynastar júıesiniń ınstıtý­sıonaldyq negiziniń ózegi sanalady. Qazirgi tańda BUU-ǵa álemniń moıyndalǵan memleketteri múshe. Onyń Jarǵysy halyqaralyq quqyqtyń bar­lyq qoldanystaǵy júıesin quraıdy.

Memleket basshysy uly derjavalar arasyn­daǵy teketires pen qaqtyǵystardyń órshýi­ne halyqaralyq quqyqtyń irgeli qaǵı­dattarynyń álsireýi sebep bolǵanyn atap ótti. Munyń aldyn alýdyń bir joly – BUU-nyń ortalyq organy Qaýipsizdik Keńesin reformalaý. Qazaqstan bul úderisti «orta derjavalar» men damýshy elderdiń rólin kúsheıtý arqyly júzege asyrýdy kózdeıdi. Mundaı pikirdi basqa da kóshbasshylar, sonyń ishinde Germanııa kansleri men Japonııa Premer-mınıstri qoldady.

Elimiz jahandyq ıadrolyq qarýsyzdaný kún tártibindegi kóshbasshy rólinen aınyǵan emes, halyqaralyq azyq-túlik qaýipsizdigin qamtamasyz etýde mańyzdy ról atqarýǵa nıetti. Memleket basshysy Almatyda Orta­lyq Azııadaǵy klımattyń ózgerýi jáne jasyl energetıka boıynsha jobalyq keń­sesin jáne BUU-nyń Ortalyq Azııa men Aýǵan­stanǵa arnalǵan óńirlik ortalyǵyn iske qosý boıynsha birqatar naqty bastama kóterdi. Sondaı-aq 2026 jyly elimizde BUU-nyń aımaqtyq klımattyq sammıtin ótkizýdi josparlap otyrmyz. Bıologııalyq qaýipsizdik jónindegi halyqaralyq agenttik qurýdy jaqtaımyz.

Memleket basshysy BUU Bas Assamb­leıasy­nyń sessııasy aıasynda 11 memlekettiń basshy­lary­men ekijaqty kezdesý ótkizdi. Bul kelissóz­der serik­testermen strategııalyq qarym-qa­ty­nas­­­tarymyzdyń tıimdi damýyna jol ashady. Mem­­leketimizdiń ekijaqty jáne kópjaqty ba­ǵyt­­taǵy belsendi syrtqy saıasatymen qatar ult­tyq damý maqsattaryn júzege asyrýǵa yqpal etedi.

Mıras JIENBAEV,

Strategııalyq zertteýler ınstıtýty

Eýropalyq jáne amerıkalyq zertteýler bóliminiń jetekshi sarapshysy