«Qazaqstan» teleradıokorporasııasy túsirgen «Mirjaqyp. Oıan, qazaq!» telehıkaıasynyń negizindegi tolyqmetrajdy kórkem týyndy búginnen bastap kórermenge jol tartady. Aqynnyń rólin somdaýǵa elordalyq «Jastar» teatrynyń akteri Baqyt Qajybaev tańdalǵan.
– Rólge kastıng arqyly tańdaldym. Rejısserdiń tańdaýy maǵan túsken eken. Negizi jaýapkershiligi zor ról dep aıtar edim. Mirjaqyp atamyzdyń aty Qazaq eline aıan. О́ziniń boztorǵaı jany shyryldap, eli, jeri úshin janyn qıǵan asyl azamat. Osy róldi somdaıtyn kezde qýanyshymnan góri qorqynyshym basym boldy. Túsirilim barysynda qatty qınaldym dep aıta almaımyn. О́ıtkeni rejısserdiń, ssenarııdiń myqtylyǵy shyǵar dep oılaımyn. Biraq qıyndyqtar da boldy. Ýaqytqa baılanysty. Ásirese túngi túsirilimder. Róldi somdaǵan kezde akter retinde áttegen-aı degen sátter de boldy. Bul árbir akterde bolady dep oılaımyn. Fılmdi kórip otyryp myna jerin basqasha oınaýym kerek edi deıtin sátter bolady, – deıdi akter Baqyt Qajybaev.
«Qazaqstan» RTRK» AQ basqarma tóraǵasy Lázzat Tanysbaı tarıhı serıaldarǵa kórermenniń suranysy da kóp ekenin aıtady.
– Bul biz úshin tájirıbe deýge bolady. Sebebi fılm túsirý korporasııanyń mindetine jatpaıdy. О́tken jyly «Mirjaqyp. Oıan, qazaq!» serıalyn shyǵardyq. Suranys óte kóp boldy. Túsirgen tarıhı serıalǵa birde-bir syn bolǵan joq. Muny maqtanyshpen aıta alamyz. Birinshiden, ol – rejısser Murat Esjannyń jumysy. Ekinshiden, biz osy ýaqytqa deıin jınaǵan tájirıbemizdi, bar kúshimizdi soǵan saldyq. Sondyqtan da keremet týyndy shyqty. Halyqtyń suraıtyny, ásirese jastarǵa kerek fılm ekenin túsinemiz. Sondyqtan sol týyndyny qaıtadan montajdadyq, kerek jerlerin qaıta túsirtip, óńdep shyǵardyq. Búkil qazaq kóretin, sanamyz úshin, qoǵam úshin paıdaly fılm boldy dep oılaımyn, – deıdi Lázzat Tanysbaı.
