Avtobýstyń toqtaǵany sol edi, aıaldamada turǵandar qazaq, orys tilderinde «Týǵan kúnińmen, Vıtıa!» dep, dabyrlap quttyqtaı jónelgende óz kózine ózi senbeı qaldy. Aralarynda kent ákimdiginiń bas mamany Serik Esenǵalıev, kenttiń qadirmendi aqsaqaly Tilegen Rahymbekov, aýdandyq máslıhattyń depýtaty Azamat Smaǵulov ta bar eken. Sol jerde turǵandardyń bári qushaqtap, betinen súıip, baýyryna qysyp jatyr. Vıtalııdiń kóńili tolqyp ketti, ne bolǵanyn túsine de almady.
Serik Esenǵalıev oǵan kent jurtshylyǵy atynan Alǵyshat jáne halyqtyń óz erkimen jınaǵan qarjylaı syılyǵy men arnaıy pisirilgen tátti tortty tabystady. Halqy tóbesine tóredeı kótergen bul azamat elge nesimen syıly boldy eken? Bylaı qarasań, bar-joǵy avtobýs júrgizýshisi ǵana ǵoı. Bizdi osy suraq qyzyqtyrdy.
Elýdiń bel ortasyna jaqyndap qalǵan ol eńbek jolyn mektep bitirgen boıda Jezqazǵan kentindegi avtokólik kásipornynda slesar bolýdan bastaǵan eken. Keıin ásker qatarynda azamattyq boryshyn ótegen soń sol kásiporynǵa qaıta oralyp, júrgizýshi bolyp ornalasypty.
– 1991 jyldan beri kóliktiń rýlin ustap kelemin. 2017 jyldan bastap «Qojahmetov» jeke kásipornyna qarasty avtobýs júrgizýshisimin. Sońǵy tórt-bes jyl kóleminde Sátbaev – Jezdi aralyǵyndaǵy jolaýshylar avtobýsyndamyn, degen Vıtalıı Jezdi jurtshylyǵynyń ózine kórsetken qurmeti keremet tosynsyı bolǵanyn aıtyp, tańdanysyn jasyrmady.
Jolaýshylar oǵan qaltqysyz qyzmeti úshin dán rıza kórinedi. Ádette, qalaaralyq avtobýstardyń negizgi bir aıaldamasy bolady. Jolaýshylar sol jerge kelip avtobýsqa otyrady, sol jerden túsip qalady. Al Vıtalıı jolaýshylardy kenttiń basty-basty kóshelerin aralap júrip mingizip, túsirip otyrady eken. Ásirese bul qartań kisilerge, sondaı-aq qol júgi aýyrlaý adamdarǵa óte yńǵaıly ǵoı.
Jezdi kentiniń Qarsaqbaıǵa qaraı shyǵaberis jaǵyndaǵy Abaı, Imanjan, Oń jaǵalaý, Aqmolda, Kenshiler kósheleriniń kent ortalyǵyndaǵy №6 mekteptiń túski ýaqytta oqıtyn balalary mektepke Vıtalııdiń avtobýsymen tegin qatynaıtyn kórinedi. Ol jolaýshylardyń jaǵdaıyna qaraı qyzmet etýdi basty mindeti sanaıdy eken.
– Bul Vıtıa degen naǵyz myńbolǵyr bala ǵoı. Keıde úlken qalalarda qaltasynda tıyn-tebeni bolmaı qalǵan balany da, úlkendi de marshrýttan túsirip ketip jatqan jaǵdaılardy kórip jatamyz ǵoı. Men Vıtıanyń balalardan aqsha alǵanyn kórgen emespin. Bizdiń ózimiz keıde «aqsha bolmaı qaldy, pensııaǵa deıin kúte turasyń ba?» desek boldy, ol qabaǵyn shytpaıdy, «mine berińiz» deıdi. Mundaı azamattan aınalyp-aq ketpeısiń be?, – deıdi kópbalaly Bıken apa.
– Bul kisiniń eshqashan daýys kótergenin, bireýmen sózge kelgenin kórgen emespiz. Únemi rıza bolyp otyramyz. «Syıǵa – syı» demekshi, oǵan óz rızashylyǵymyzdy qalaı jetkizýdi oılap, týǵan kúninde erekshe quttyqtaý jasaýdy jón sanadyq. Uıaly telefonda arnaıy chat ashtyq, sol arqyly jınaldyq. Estimeı, bilmeı qalǵan kisiler keıin bizge ókpelep te jatyr. Vıtıa sondaı rıza boldy. Jaqsynyń jaqsylyǵyn dáripteı bilýimiz kerek. Biz onyń basqa jaqqa ketip qalǵanyn qalamaımyz. О́ıtkeni Vıtalıı sekildi adam tabylmaıdy, deıdi onyń týǵan kúnine tosynsyı jasaýǵa bastamashy bolǵan, kent turǵyndarynyń biri, muǵalim Ásem Qulajanova.
Vıtalıı – ónegeli otbasynyń ıesi, shattyqty shańyraqtyń otaǵasy. Ol áıeli Anastasııa ekeýi Vıktor, Kırıll jáne Vıolla esimdi úsh bala tárbıelep, ósirip otyr.
Qarapaıym eńbek adamy bılik tarapynan kóbine elene bermeıdi. Biraq halyq kimniń kim ekenin jaqsy biledi. Týǵan kúnin el bolyp toılap jatsa, budan artyq maqtaý, marapat bola ma? Vıtalıı halyq tarapynan sondaı erekshe marapatqa bólendi. Eldiń ystyq yqylasyn sezindi, qurmetin kórdi.
Ulytaý oblysy,
Jezdi kenti
