Foto Bolat Tileptiń Facebook paraqshasynan alyndy
«Qurmetti Abaı ýnıversıtetiniń ujymy! Qadirmendi dostar! Qazaq biliminiń qara shańyraǵy atanǵan, 95 jyldyq tarıhy bar tuńǵysh joǵary oqý ornymyzda rektorlyq qyzmetimdi bastadym. Men úshin Qazaqstandaǵy pedagog kadrlaryn daıarlaýda mańyzdy ról atqaratyn joǵary oqý ornyn basqarý úlken abyroı jáne jaýapkershilik. Ýnıversıtetimiz tamyry tereń, baı tarıhy bar jáne Qazaqstan men búkil álem úshin bilim men mádenı qundylyqtardyń senimdi kózi bolyp tabylady.
Abaı atyndaǵy QazUPÝ 1928 jyly qurylyp, sodan beri otandyq bilimniń flagmany bolyp qalyptasty. Ýnıversıtet qabyrǵasynda eńbek etip, el tarıhynda óshpes iz qaldyrǵan qazaq halqynyń kórnekti ustazdary: Oraz Jandosov, Sáken Seıfýllın, Baımen Almanov, Ahmet Baıtursynov, Sanjar Asfendııarov, Halel Dosmuhamedov, Temirbek Júrgenov syndy tulǵalardyń eńbegin atap ótpeske bolmaıdy. Bul uly tulǵalar Qazaqstanda bilim, ǵylym men mádenıettiń damýyna jan-jaqty yqpal etti jáne olardyń murasy barlyǵymyz úshin amanat bolyp qala beredi», dep jazdy Bolat Tilep Facebook paraqshasynda.
Sondaı-aq ol zamanaýı jáne dástúrli bilimdi ushtastyratyn jańa formasııadaǵy ustazdardy qalyptastyrý basty mindet ekenin aıtty.
− «Jumyla kótergen júk jeńil» demekshi, ujym bolyp ýnıversıtetimizdi armandar oryndalatyn jáne keremet nátıjelerge qol jetkizetin oqý ordasyna aınaldyraıyq. Eń bastysy, bizde kez kelgen kedergilerdi birge eńserýge bolatyn myqty kadrlar bar. Men óz kezegimde ujymmen birge ýnıversıtetimizdi odan ári damytyp, kıeli qara shańyraǵymyzdyń dańqty tarıhyn jalǵastyrýǵa bar kúsh-jigerimdi salamyn. El bolashaǵy Qazaqstannyń jetekshi pedagogıkalyq ýnıversıtetine baılanysty, óıtkeni ol jas urpaqtyń damýyna jaýapty mamandar daıarlaıdy, − delingen jazbada.
