Árıne, bul – Qazaqstan ulttyq quramasynyń FIFA músheligine engen 1994 jyldan bergi eń úzdik kórsetkishi emes. Ulttyq quramanyń FIFA reıtıngindegi statıstıkasyna kóz júgirter bolsaq, 2001 jyly jerlesterimiz ÝEFA quramyna ótpeı turyp reıtıngte 97-orynǵa deıin kóterilip, ózindik rekord ornatqan bolsa, araǵa 15 jyl salyp 2016 jyly 83-orynǵa deıin kóterilgen edi. Sol jyly otandyq maman Talǵat Baısýfınov qurama tizginin ustaǵan ýaqytta otandastarymyz táýir oıynymen jankúıerlerdiń qýanyshyna bólenip, óz jerimizde azýly Polsha quramasymen 2:2 esebimen teń oınaǵannan keıin reıtıngte birden 13 saty joǵarylap, 83-orynnan kóringen edi.
Bıyl jyl sońyna deıin jerlesterimiz FIFA reıtıngindegi óz rekordyn jańarta almas. О́ıtkeni jańa jylǵa deıin ulttyq quramanyń sanaýly oıyndary qaldy. Eger kelesi jyly da ulttyq qurama fýtbolshylary dál osylaı óner kórsetetin bolsa, onda nátıjemizdi jaqsartýǵa mol múmkindigimiz bolady.
Jýyrda ǵana jarııalanǵan FIFA reıtıngine nazar aýdaratyn bolsaq, álemdik reıtıngtiń kóshin bastap turǵan alǵashqy ondyqta da azdaǵan ózgerister oryn alǵanyn baıqaımyz. Máselen, 2016 jylǵy Eýropa chempıondary Portýgalııa segizinshi orynǵa kóterilip, Qart qurlyq birinshiliginiń eń keıingi jeńimpazy Italııany (2021) toǵyzynshy orynǵa yǵystyrdy. Al úzdik úshtik bul joly da ózgerissiz qaldy. Reıtıngtiń kóshin byltyrǵy álem chempıondary Argentına quramasy bastap turǵan bolsa, ekinshi orynǵa Fransııa fýtbolshylary, úshinshi satyǵa Brazılııa quramasy jaıǵasqan.
Eýropa chempıonatynyń bıylǵy irikteý kezeńinde Qazaqstan quramasymen bir topta óner kórsetip jatqan quramalarǵa toqtalar bolsaq, ázirge bizdiń toptaǵy eń úzdik nátıje Danııa quramasyna tıesili. Olar 1606.84 upaımen 18-orynda tur. Keıingi satylarǵa Fınlıandııa (54-oryn), Slovenııa (59), Soltústik Irlandııa (74) jáne San-Marıno (207) fýtbolshylary ornalasqan.
Qazaqstan quramasy qyrkúıek aıynda Eýro-2024 irikteý kezeńi aıasynda eki oıyn ótkizip, alǵashqysynda Fınlıandııaǵa ese jiberse (0:1), ekinshi oıynda Soltústik Irlandııadan 1:0 esebimen basym túsken edi. Sol nátıjesiniń arqasynda jerlesterimiz reıtıngte qosymsha 9 upaıǵa ıe bolyp, jalpy 1206.94 upaımen 100-orynǵa kóterilip aldy. Buǵan deıingi reıtıngte jerlesterimiz 104-satyǵa ornalasqan edi.
Aıta keteıik, otandastarymyz irikteý básekeleriniń alǵashqy alty týr oıyndarynan keıin el fýtboly tarıhyndaǵy rekordtyq 12 upaıdy jınap, qosymsha kórsetkishter boıynsha Fınlıandııadan (12 upaı) keıingi tórtinshi orynǵa jaıǵasty. Slovenııa men Danııa quramalary kósh bastap tur (árqaısysynda 13 upaıdan). Qazaqstan quramasy Eýro-2024 irikteý kezeńindegi kelesi eki matchyn syrt alańda ótkizedi. Magomed Adıev shákirtteri 14 qazanda Danııamen, 17 qazanda Fınlıandııa quramalarymen kezdesedi.
