Qaraǵandynyń bank kolledjine oqýǵa túsken Esbolat Erbolatuly stýdent kezde bos júrispen ýaqyt ótkizbedi. Qoly qalt etse, eńbek etti. Qatarlastary sekildi qyzyq qýǵan joq. Bar oıy – kıimine, júrip-turýyna aýyldaǵy ata-anasynan aqsha suramaý edi. О́zi bolyp-tolǵysy keldi.
Sodan tanys dosy arqyly avtobýsqa kondýktor bolyp jumysqa turady. Úsh jyl kánigi júrgizýshiniń janynda júrip, jumystyń barysyn ábden meńgerip alady. Eńbekke osylaı eti erte úırenedi. Osy ýaqyt aralyǵynda oqýyn da oıdaǵydaı bitiredi. Biraq dıplommen jumys isteý aıaqqa turýǵa qıyn bolatynyn o bastan túsingen. Esbolat kondýktor bolyp júrgen kezinde júrgizýshi kýáligin oqyp alady. Oqýynan ábden bosaǵan soń birden júrgizýshi bolýdy uıǵarady. Avtopark basshylary da eńbekqor jigittiń erik-jigerin jaqsy biledi. Birden qabyldap, avtobýs beredi. Mine, sodan beri on jyl ótti. №43 avtobýstyń júrgizýshisi.
Esbolat – áke-sheshesiniń jalǵyz uly. «Mundaı bolyp erjetýime ákem men sheshemniń parasaty, tárbıesi sep», deıdi ózi. Jalǵyz balalaryn óbektep emes, eńbekten qashpaıtyn, ójet qylyp ósirgen áke-sheshesi de aýyldyń qarapaıym eńbek adamdary eken.
«Bala kezimnen ákeme kómektestim. Mal jaıǵaǵanda da, shóp shapqanda da, úı sharýasynda da únemi qasynda júrdim. Anam ekeýmiz ormanǵa baryp, sańyraýqulaq teretinbiz. Aýyr shelekti kóterip, ony arbaǵa tıep, aýylǵa deıin súırep keletinbiz. Oıyn balasy bolǵanda bar oılaıtynym, ákem men anama qolǵabys etý edi. Sonyń bári meni shyńdady», deıdi E. Erbolatuly.
Esbolat qalada júrip, aýyldaǵy qara shańyraǵynyń qamyn kúıttep otyr. Ákesine kólik mingizgen. Qorasyn malǵa toltyrǵan.
О́zi de qaladan eki bólmeli páter alǵan. Byltyr úılenip, toıyn da dúrkiretip jasaǵan. «Osynyń bári – avtoparkte etken eńbegimniń mańdaı teri», deıdi ol.
Qazir aıaýly jary Gúljarqyn ekeýiniń Raıana esimdi kishkentaı kózqýanyshtary bar. Jaqynda ǵana tusaýyn kesken. Ár basqan qadamynan shýaq sezinip otyr.
«Keshke qaraı jumystan qajyp kelip, qyzymdy qushaqtap, ıiskegende, búkil sharshaǵanym basylyp qalady. Qazir úıge asyǵamyz», deıdi ezý tartyp.
Tań bozaryp atqannan atqa qonady. Shamamen, tańǵy bes-altynyń kezinde avtobýsty maılap alady. Sodan jolǵa shyǵady. Keshke deıin kúnine qala ishinde 4-5 aınalym jasaıdy. Keshkilik jumys aıaǵyna qaraı, avtobýsty jýyp, tazalaıdy. «Jumystyń basty qıyndyǵy – jolaýshylardyń qaýipsizdigi. Soǵan alańdaımyz. Únemi jolda júrgendikten túrli júrgizýshi kezigedi. Solardan abaılaımyz», – Esbolat Qarpyqbaev. Jasyratyny joq, qıyndyqtarǵa da tap boldyq. Jol apatyna da tústik. Biraq sonyń bári sabaq boldy. Shyńdaldyq. Shúkir, jaman bolǵan joqpyz».
Qanaǵaty bar jigit demalysynda aýylyna asyǵady. Eki kúnde qara shańyraǵyndaǵy qara jumysty eńserip, bir jaǵynan áke-sheshesine erkelep qaıtady. Ol kisiler de ár demalys saıyn jolǵa qarap, balalaryn kútedi. Qalaǵa kóshirip alaıyn dese, ol kisilerdiń aýyldan ajyraǵysy kelmeıdi. Osylaısha, aýylda aq batasyn jaýdyryp, tileýin tilep otyr.
Ata-anasynyń aq tileýimen joly ashylǵan Esbolat Erbolatulynyń eńbekpen keship júrgen qońyr tirshiligi osyndaı.
Qaraǵandy oblysy
