Halyqaralyq jastar saıası lageriniń jumysyna Májilis spıkeri, «Amanat» partııasynyń tóraǵasy Erlan Qoshanov qatysyp, jastardy quttyqtady. Quttyqtaý sózinde Erlan Qoshanov ShYU-ǵa múshe jáne baıqaýshy memleketterdiń aldynda turǵan mindetterdi iske asyrýdaǵy jastardyń róline toqtaldy.
«Qazirgi zamanda barlyq eldiń teń quqyqtyq negizdegi ózara is-qımyly úshin jaǵdaı jasaý asa mańyzdy. Sondyqtan Prezıdent Qasym-Jomart Toqaev Qazaqstannyń ShYU-ǵa tóraǵalyǵy barysynda «Ádiletti álem men kelisimdi jaqtaıtyn dúnıejúzilik birlik týraly» bastama usynýǵa nıetti ekenin málimdedi. Ol ShYU men onyń keńistiginiń odan ári damý baǵdaryn aıqyndaıdy. Bul jumysqa ShYU-ǵa kiretin barlyq el jastarynyń belsendi aralasýy mańyzdy», dedi ol.
Saıası lagerge elimizdiń barlyq óńirinen kelgen 300-den astam delegat, sondaı-aq Belarýs, Qytaı, Qyrǵyzstan, Tájikstan, Reseı jáne О́zbekstannan kelgen qonaqtar 4 kún boıy «Bir Tolqynda» dıalog alańdarynyń, taqyryptyq paneldik sessııalar men oqytý semınarlarynyń jumysyna qatysty.
Bıylǵy shilde aıynda Prezıdent Qasym-Jomart Toqaev ShYU-ǵa múshe memleketter basshylary keńesiniń otyrysynda sóılegen sózinde, «úsh zulym kúshke»: transulttyq uıymdasqan qylmysqa, zańsyz esirtki aınalymyna jáne kıberqylmysqa qarsy kúreske basa mán beriletinin aıtqan bolatyn. Sondaı-aq Memleket basshysy sıfrlyq tehnologııalardy damytýdyń ózektiligine jáne ekologııa salasyndaǵy ózara is-qımyldy nyǵaıtýǵa nazar aýdarǵan edi. Osy maqsatty júzege asyrýdyń bir tetigi retinde halyqaralyq jastar saıası lageriniń jumysyn aıtýǵa bolady.
«Eń aldymen, Prezıdent belgilegen kún tártibine súıene otyryp, biz basqa elderdiń jastar belsendilerimen kommýnıkasııalyq baılanysty nyǵaıtamyz. Jastardyń áleýetin tıimdi paıdalaný jáne olardyń kúsh-qýatyn qazirgi jaǵdaıdy jaqsartýǵa jáne senimdi bolashaqty qalyptastyrýǵa baǵyttaý mańyzdy», dedi óz sózinde «Jastar rýhy» uıymy tóraǵasynyń orynbasary Aqerke Eskendirova.
Al Shymkentten kelgen delegat Baqytjan Turysbek mundaı deńgeıdegi is-sharaǵa alǵash ret qatysyp otyr eken. «Jastar rýhy» uıymynyń barlyq múshesi elimizdiń jáne ShYU-nyń eń belsendi jastarynyń basyn qosqan bul is-sharany asyǵa kútti. Túrli salada júrgen jastar jınalatyn ortada ózara tájirıbe almasyp, aımaqtaǵy jáne ózge elderden kelgen jastarmen dostyǵymyzdy nyǵaıta túsemiz. Budan bólek, lagerdiń kún tártibi aıasynda ótetin semınarlardy da atap ótken jón. Máselen, esirtkimen kúres taqyryby aıasynda trenıng joǵary deńgeıde ótti», deıdi delegat Baqytjan Turysbek.
Jalpy, is-shara barysynda Qytaı Halyq Respýblıkasyndaǵy ShYU Jastar keńesiniń Ulttyq bóliminiń múshesi Iаn Szınveı, Qyrǵyz Respýblıkasy Mádenıet, aqparat, sport jáne jastar saıasaty mınıstriniń orynbasary Marat Taǵaev, О́zbekstan Respýblıkasy Olıı Májilisiniń zań shyǵarý palatasy janyndaǵy Jastar parlamentiniń múshesi Gýzal Abdýllaeva, ShYU Jastar keńesiniń Úndi Ulttyq bóliminiń múshesi, Halyqaralyq stýdentter odaǵynyń prezıdenti Shoýkat Hashım, ShYU Jastar keńesiniń Reseı Ulttyq bóliminiń basshysy Alekseı Karpenko, Tájikstan Respýblıkasy Jastar odaǵy apparatynyń basshysy Farıdýn Hýsenzoda, Belarýs Respýblıkalyq Jastar odaǵy Ortalyq komıtetiniń birinshi hatshysy Aleksandr Lýkıanov sóz sóıledi.
