Janýarlardyń jáne olardan alynatyn ónim men shıkizattyń tasymaldanýyn baqylaýda ustaýǵa múmkindik beretin sáıkestendirý sharalaryn júrgizý oblystyq veterınarııa basqarmasyna mindettelgen. Mal basyn birizdendirý kezinde AShJB aqparattyq júıesine túliktiń sany týraly málimetter engizilip, syrǵalaý, tańba basý, radıojıilikti belgisi bar syrǵa, bolıýs, chıp taǵý, ár basqa jeke nómir berý jumystary atqarylady.
Oblystyq veterınarııa basqarmasynyń basshysy Ahat Shektibaevtyń aıtýyna qaraǵanda óńirdiń epızootııalyq ahýaly turaqty. Buǵan asa qaýipti juqpaly mal aýrýlarynyń aldyn alatyn vaksına egý jáne dıagnostıkalyq zertteý jumystarynyń belgilengen josparǵa sáıkes der kezinde júrgizilýi sep bolyp otyr.
Sala mamandary maldyń qan sarysýyna dıagnostıkalyq zertteý júrgizý barysynda brýsellezge shaldyqqan janýarlardy soıýǵa erekshe mán beredi. Juqpaly dert anyqtalǵan jaǵdaıda ıesi aýrý malyn 15 kúnniń ishinde et óńdeý kásipornyna nemese soıý pýnktine jiberýge mindetti. Al aýdandyq jáne qalalyq veterınarııa beketteri mal ıelerin tegin kóliktermen qamtamasyz etýge tıis. Brýsellezge ushyraǵan maldy tasymaldaýǵa osy jyly jergilikti bıýdjetten 30 mln teńgeden asa qarajat bólinip otyr.
– Aýrý maldy soıý sehtaryna tapsyrý barysynyń durystyǵyn baqylaý úshin sanıtarlyq soıý aktisi jasalyp, oǵan janýardyń ıesi men soıý pýnktiniń ókili qol qoıady. Mundaı sharalar brýsellezdiń taralýyn boldyrmaý jáne aýrýdyń paıda bolýynyń epızootııalyq tizbegin anyqtaý úshin qoldanylady. Soıý nysandarynda maldyń eti men ishki organdarǵa veterınarlyq-sanıtarlyq saraptama júrgiziledi. Iri qara malda brýsellezge tán belgiler anyqtalǵan jaǵdaıda onyń eti men ishki organdary óńdeýge jiberiledi. Mal ıesine pyshaqqa ilingen janýardyń naryqtaǵy qunynyń 30 paıyzy mólsherinde ótemaqy tólenedi. Sondaı-aq brýsellezben aýyrǵan usaq mal da ishki organdarymen qosa mindetti túrde qaıta óńdeledi. Onyń da 30% mólsherinde quny óteledi. Jalpy, jyl basynan beri brýsellez anyqtalǵan 180-deı usaq malǵa 1 mln 564 myń teńge ótemaqy tólendi, – deıdi Ahat Shektibaev.
Oblystyq veterınarııa basqarmasynyń mamandary juqpaly aýrýdyń aldyn alý maqsatynda sharýashylyqtardyń qora-jaılaryn dezınfeksııalaý sharalaryn júrgizedi. Búginde óńirdegi barlyq veterınarııa beketterinde dezınfeksııalyq qondyrǵy ornatylǵan arnaıy avtokólik bar. Dezınfeksııa preparattary da jetkilikti.
Bıyl oblys kólemindegi 382 qora-jaıǵa májbúrli dezınfeksııa, 254 nysanǵa profılaktıkalyq dezınfeksııa júrgizilgen.
Qostanaı oblysy
