Keńeste halyqaralyq bıznesti damytý ortalyǵyn qurý, ınvestısııalar tartý, ınfraqurylym júrgizý, iskerlik qyzmet nysandaryn salý jónindegi sharalar, sondaı-aq birqatar uıymdastyrý máselesi qaraldy.
Júrgizilip jatqan jumystar týraly ulttyq ekonomıka mınıstri Álibek Qýantyrov pen Almaty oblysynyń ákimi Marat Sultanǵazıev baıandama jasady.
Talqylaý qorytyndysy boıynsha Premer-mınıstr ýákiletti memlekettik organǵa birqatar tapsyrma berdi.
Eske sala keteıik, tujyrymdamaǵa sáıkes Almaty jáne Qonaev qalalarynyń aralyǵyndaǵy ıntegrasııalanǵan G4 City qalasy tórt aýdannan turady: Gate – iskerlik jáne qarjylyq ortalyq, Golden – bilim berý jáne medısına salalary boıynsha habtar, Growing – ónerkásiptik jáne logıstıkalyq habtar, Green – týrıstik klaster.
Bıyl kóktemde Almaty oblysynda 2048 jylǵa deıin jalpy aýdany 30 myń ga bolatyn «G4 City» arnaıy ekonomıkalyq aımaǵy quryldy. Bul ıntegrasııalanǵan qalany qurýǵa otandyq jáne sheteldik ınvestısııalardy tartý úshin qolaıly klımatty qamtamasyz etedi.
