Týrnır kestesinde kósh bastap kele jatqan Shymkenttiń «Ordabasy» klýby óz alańynda 18-týrdyń keıinge qaldyrylǵan matchynda taǵy bir ońtústiktiń komandasy «Maqtaaraldy» qabyldap, 1:0 esebimen basym tústi. Oıyndaǵy jalǵyz ári jeńis golyn matchtyń 61-mınýtynda Bobýr Abdýhalıkov soqty. Al shymkenttik komandany týrnır kestesinde ókshelep kele jatqan elordanyń «Astanasy» da 18-týrdaǵy keıinge shegerilgen matchta Kókshetaýdyń «Oqjetpesin» 5:2 esebimen qapy qaldyrdy. «Astana» sapynan Marın Tomasov het-trık jasasa, Abat Aıymbetov pen Dembo Darbo qanjyǵasyn bir golmen maılady. Al «Oqjetpes» klýbynan Alekseı Tataev pen Samat Sársenov mergendigimen kózge tústi.
Sondaı-aq 15-týr oıynyn ótkizgen Petropavldyń «Qyzyljary» men Qostanaıdyń «Tobyly» 1:1 esebimen teń tarqasty. Oıynnyń birinshi taımynda Islam Chesnokov «Tobyldy» alǵa shyǵarsa, ekinshi taımda Evgenıı Shahov óz qaqpasyna gol soǵyp aldy. El chempıonatynyń 24-týr oıyndary 30 qyrkúıek pen 1 qazan kúnderi ótedi.
