Qazaqstan delegasııasy Germanııadan oljaly oraldy

Máselen, Prezıdent Q.Toqaev «HMS Bergbau AG» kompanııasynyń basqarma tóraǵasy Dennıs Shvındti qabyldady. Atalǵan kompanııa basshysy Shyǵys Qazaqstan oblysynda lıtıı óndiretin jáne ony qaıta óńdeıtin ken baıytý kombınatyn salý jobasyn tanystyrdy. Onyń aıtýynsha, josparlanǵan ınvestısııanyń jalpy somasy – 500 mıllıon dollar.

«HMS Bergbau AG» – Germanııadaǵy qatty paıdaly qazbalardy barlaýmen jáne óndirýmen aınalysatyn jetekshi kompanııalardyń biri. Bul kompanııa AQSh, Sıngapýr, OAR, Indonezııa, Polsha, BAÁ, Botsvana memleketterinde shıkizat óndirý jumystaryn belsendi júrgizedi. Sondaı-aq onyń Qytaıda, Úndistanda, Kenııada, Malaızııada, Pákistanda, Shrı-Lankada, Bangladeshte jáne Vetnamda ókildikteri bar.

«Memleket basshysynyń Germanııaǵa sapary aıasynda «HMS Bergbau» basshy­lyǵymen kezdesý ótti. Atalǵan kompanııa sırek metall óndirisimen aınalysatyn iri kásiporyn. Qazaqstanda «HMS Bergbau» tıisti barlaý jumystaryn júrgizedi. Alǵashqy nátıjege kelesi jyly qol jetkizemiz dep kútip otyr­myz», deıdi «Samuryq-Qazyna» AQ bas­qarma tóraǵasy Nurlan Jaqypov.

Bul sózdi «Astana» halyqaralyq qarjy ortalyǵynyń basqarýshysy Renat Bekturov ta qýattady. Onyń aıtýynsha, atalǵan kompanııa ken óndirisi salasynda zertteý jumystaryn júrgizip jatyr. Kelesi jyly jańa jobalarǵa ınvestısııa jasaýǵa daıyn.

Sondaı-aq Memleket basshysy «HHLA» kompanııasynyń basqarma tóraǵasy Angela Tıtsratpen kezdesti. Kezdesý barysynda Qazaqstan men Ger­manııanyń kólik-logıstıka salasyn­daǵy yntymaqtastyǵyn nyǵaıtý pers­pektıvalary talqylandy. «HHLA» – jetekshi eýropalyq logıstıkalyq kompanııa. Kásiporyn Gambýrg, Odessa, Tallınn, Trıest qalalaryndaǵy teńiz porty termınaldaryna, sondaı-aq olarmen baılanystyrylǵan Ortalyq jáne Shyǵys Eýropadaǵy ıntermodaldyq toraptar jelisine ıelik etedi.

«Sonymen qatar «HHLA» kompanııa­symen de kelissóz júrgizildi. Ol – logıs­tıka salasyndaǵy kóshbasshynyń biri. Jaqyn arada Qazaqstan temir joly kompanııasymen birlesip elimizde ortaq joba bastamaq. Port ınfraqurylymyn jáne logıstıka ınfraqurylymyn damy­týǵa nazar aýdarady. Qazirdiń ózinde Almatyda ofıs ashqan», deıdi «Astana» halyqaralyq qarjy ortaly­ǵynyń basqarýshysy R.Bekturov.

Taǵy bir mańyzdy kezdesý «STADA Group» kompanııasynyń vıse-prezıdenti Krıstos Gallıspen ótti. Áńgime barysynda densaýlyq saqtaý jáne farmasevtıka salalaryndaǵy yntymaqtastyq perspektıvalary talqylandy. «STADA»  – jo­ǵary sapaly dári-dármek ón­­di­re­tin jetekshi kompanııalardyń biri. Kompa­nııa óz ónimderin álemniń 120 elinde sa­tady. Krıstos Gallıstyń aı­týyn­­sha, kompanııa yntymaqtastyqty ny­ǵaı­týǵa qyzyǵýshylyq tanytyp, Qazaq­standaǵy medısınalyq jobalar men baǵdarlamalarǵa ınvestısııa quıý múmkin­dikterin qarastyrýǵa daıyn.

«Memleket basshysy kezdesken kelesi kompanııa – «STADA Group» kompanııasy. О́zderińizge málim, atalǵan korporasııa farmasevtıka salasyndaǵy álemdik kóshbasshynyń qatarynda. Qazirdiń ózinde Eýrazııa aımaǵyndaǵy ortalyq habyn Almatyda ashylǵan. Onda eki júzden astam qazaqstandyq jumys isteıdi», deıdi «Astana» halyqaralyq qarjy ortalyǵynyń basqarýshysy R.Bekturov.

Taǵy bir mańyzdy kezdesý dep «Euler Hermes» agenttiginiń basqarma múshesi Edna Shıonemen ótken kelissózdi aıta alamyz. Kezdesý barysynda ekonomıkalyq yntymaqtastyqty odan ári nyǵaıtý, sonyń ishinde qarjylyq saqtandyrý salasynda birlesken jobalardy ázirleý, tájirıbe almasý jáne oqý baǵdarlamalaryn uıymdastyrý múmkindikteri qarastyryldy.

Qazirgi tańda Qazaqstan damý banki men «Helaba» banki arasynda Qarjylyq yntymaqtastyq týraly kelisimge qol qoıylǵan. Atalǵan kelisimge sáıkes «AltynAlmas Reagents» kompanııasynyń sıanıd natrıı óndiretin hımııalyq zaýytynyń qurylysyna 100 mıllıon eýroǵa deıin qarjy bólý qarastyrylǵan.

«Memleket basshysy «Euler Hermes» kompanııasynyń basshylyǵymen kezdesti. «Euler Hermes» – Germanııadaǵy eń iri kompanııalardyń biri. Qarjy, saqtandyrý qyzmetterimen aınalysa­dy. О́zderińizge málim, taıaýda «QazMunaı­Gaz» iri polıetılen jobasyn iske qos­qa­ly jatyr. Oǵan Germanııadan jáne ba­sqa da shetelden qarajat tartamyz. Sondyqtan «Euler Hermes» kompa­nııasymen jobaǵa qatysty Ger­manııa­dan qarajat tartý boıynsha naqty memorandýmǵa qol qoıdyq. Bul joba jaqyn arada iske qosylady», «QazMunaıGaz» UK» AQ basqarma tóraǵasy Maǵzum Myrzaǵalıev.

«Astana» halyqaralyq qarjy or­taly­ǵynyń basqarýshysy R.Bekturov­tyń sózine súıensek, «Euler Hermes» eks­porttyq-kredıt kompanııasynyń elimizde jumys isteýi nemis bıznesin Qazaq­stanǵa ákelýge úlken septigin tıgize­di. О́ıtkeni bul – memleket tarapynan kepildik beretin úlken qarjy uıymy.

Qoryta aıtqanda, Memleket basshysy Q.Toqaevtyń Germanııaǵa jasaǵan sapary oljaly boldy dep tolyq senimmen aıta alamyz. Bul ekijaqty qarym-qaty­nas­ty nyǵaıtyp qana qoımaı, elimizdiń damýyna qajet ilkimdi jobalardy júzege asyrýǵa múmkindik beredi.