Foto: Ashyq derekkóz
– Sizdi tanymal etken áleýmettik jeli. Ánshilik ónerdi kásibı meńgerdińiz be, álde qannan daryǵan talant pa?
– Joq, kásibı mamandyǵym temirjol salasymen baılanysty. Bala kezimnen án aıtýǵa áýestigim artty. О́ıtkeni ákem - ánshi. Ánshi bolǵanda sahnada emes, dala tósinde án aıtqan. Jylqy baqty. Anam aýyldyq ákimdikte qyzmet istedi. Qazir ekeýi de zeınetker. О́zimiz tórt aǵaıyndymyz, úıdiń úlkeni aǵam, ózimnen keıingi baýyrlarymnyń da bir qaıyrary bar ónerden. Bala kezimnen Vıtastyń repertýaryndaǵy ánderdi shyrqaıtynmyn. «Uıalmaǵan ánshi bolady» demekshi, bar daýsymmen úıde án aıtam. Sonda kórshiler anama kelip, «radıonyń daýsyn suńqyldatpaı báseń qoıyńdar» dep ses te kórsetedi eken. Olar meniń jandy daýysty án shyrqaǵanymdy radıonyń úni dep oılasa kerek.
– Ákeńizden daryǵan ónerdiń jolyn tańdamaǵanyńyz qyzyq eken.
– Ánshi atanǵym keldi. Bala kezimnen ákem Esimhanmen birge án aıtyp, aýyl arasyndaǵy toı-tomalaqta, mektepishilik konkýrs, baıqaýlarǵa sahnaǵa shyǵyp júrdim. Atam Seıitjapar da dombyramen kúı shertip, áýeletip án salǵanda zamandastary tamsanyp otyrýshy edi. Babamyzdan daryǵan ónerdiń izine túskim-aq kelgen, bolmady. Bir kúni Almaty qalasynda ótetin konkýrsqa baratyn boldyq. Mezeti taıaǵanda jolymyzǵa qarajat taba almaı qysyldyq. Sol kezde qatty qystyǵyp jyladym. «Men búgin qaladaǵy konkýrsqa qatysýǵa qarajat tappaı otyrmyn, budan keıin de múmkindik týmaıdy ǵoı» degen ýaıym ánshilikti emes, temirjol salasyn tańdaýyma áser etti.
– Áleýmettik jelide tanymaldyǵyńyz artty, birneshe telebaǵdarlamaǵa qatystyńyz. Jolaýshylar da tanyp, án surap qolqa sala ma?
– Astana-Shymkent baǵytynda qyzmet kórsetemiz. Jolaýshylar tanyp alǵan, «opera ánshisi» dep kótermelep te jiberedi. Tipti keıingi saparymyzda úlken kisiler qaýmalap alyp, birneshe án aıtqyzyp, tambýrda bılep kóńildi keldik.
– Toıǵa shaqyratyndar da bola ma? Eńbekaqyńyzdy tóleımiz dep qyzyqtyratyndar da kezige me?
– Ondaı maqsatta telefon shalatyndar da joq emes. Biraq án aıtý – meniń hobbıim. О́nerdi men tabystyń kózi dep maldanbaımyn. Tek týys-týǵannyń toıynda án suraıdy, tegin shyrqap, kópshiliktiń kóńilin kóteremin.
– Sizdiń sahnańyz vagonnyń ishi bolǵandyqtan, jolaýshylardyń qolqasyna oraı reperýtaryńyzdy da jańartyp júresiz be?
– Negizinen jer ortasy jasynan asqan, egde tartqan kisiler án shyrqasań dep ótinish aıtady. Shámshi Qaldaıaqovtyń ánderin suraıdy, klassıkalyq áýendi qalaıtyndar opera oryndap berseń dep qıylady. Sazgerlerden arnaıy án jazdyrtpaımyn, ánshilerdiń oryndaýyndaǵy týyndylardy shyrqaımyn.
Jýyrda «Mankent» shıpajaıynda em aldym. Sol jerde de kúnde keshkilik ýaqytta meniń «jeke shyǵarmashylyq keshim» uıymdastyrylyp, shıpajaıdan ketkenshe em alýshylarǵa án shyrqap berdim.
– О́zińizdiń balalaryńyz ónerge jaqyn ba?
– Ulym onsha qyzyqpaıdy, qyzym án shyrqaǵandy qalaıdy.
