Mádenıet jáne aqparat mınıstrliginiń qoldaýymen «Qazaqstannyń ekologııalyq qory» «Kásipkerlikti damytýǵa baǵyttalǵan memlekettik jáne jeke qoldaý sharalary týraly aýyldyq aýmaqtardaǵy jastardyń habardarlyǵyn arttyrý» jobasyn iske asyryp keledi. Baǵdarlama aıasynda aýyldarda arnaıy jastar úshin kásipkerlikti damytý jónindegi memlekettik jáne jeke qoldaý sharalary túsindiriletin buryshtar uıymdastyrylady. Sondaı-aq qoǵam belsendileri keıbir oblystarǵa qarasty aýyldyq jerlerde NEET sanatyndaǵy azamattarǵa arnalǵan kóshpeli dárister men semınarlar ótkizedi. Osylaısha eńbek naryǵyndaǵy trendter men perspektıvaly kásipter týraly jan-jaqty aqparat berilip keledi.
«Joba aıasynda biz NEET jastarynyń úlesi joǵary óńirlerdegi aýyldarda turatyn jastarǵa arnap qysqamerzimdi kýrstardy uıymdastyramyz. Munda 35 jasqa deıingi jastar jumys izdeý, bıznes júrgizý daǵdylaryn, sondaı-aq sıfrlyq daǵdylardy tegin meńgeredi. Kýrs tyńdaýshylaryna SMM, target, marketıng, ınternet-kommersııa, kásipkerlik, bıznes-jospar ázirleý negizderi, túrli memlekettik baǵdarlamalar týraly aıtyp beremiz. Búginge deıin bizdiń kýrstardan Mańǵystaý oblysynyń Qaraqııa aýdanyna qarasty aýyldardyń jastary ótti. 200-den asa adam oqýmen qamtyldy. Jaqyn arada oqytý sharalaryn Túrkistan oblysynyń Shardara aýdany men Shymkent qalasynda ótkizýdi josparlap otyrmyz», dedi joba jetekshisi Aıgúl Abdýalıeva.
Búginde jastarǵa «Qazaqstannyń ekologııalyq qory» 60-tan astam keńes bergen. Joba jumysy keler jyldyń aıaǵynda qorytyndylanbaqshy. Oǵan deıin eki qolǵa bir kúrek tappaı sebepsiz sendelgenderge, baspanasyz sandalǵandarǵa aqparattyq kómek +7 771 072 47 90 nómirine qońyraý shalý arqyly da qoljetimdi.
«Jedel jeliniń kómegimen jyl sońyna deıin aýyldyq jerlerde turatyn jastarǵa 100-den astam keńes berýdi josparlap otyrmyz. Búginge deıin biz 65 adamǵa tıisti konsýltasııa berdik. Jastardy negizinen «Bastaý bıznes» granttaryn, jyldyq 2,5 paıyz jeńildigi bar shaǵyn nesıe alý máselesi qyzyqtyrady», dedi A.Abdýalıeva.
