Foto: ashyq derekkóz
Buǵan deıin memlekettik merekeler tizbesi boıynsha respýblıkada Muǵalimder kúni qazan aıynyń birinshi jeksenbisinde atalyp ótiletin. Qazir bul datany toılaý 5 qazanda álemniń 100-den astam elinde atap ótiletin Dúnıejúzilik muǵalimder kúnimen sáıkes keledi.
Halyqaralyq merekeni toılaý kúni sonaý 1966 jyly Parıjde ótken muǵalimderdiń mártebesi týraly arnaıy úkimetaralyq konferensııada bekitilgen. Shara nátıjesinde IýNESKO men Halyqaralyq uıym ókilderi «Muǵalim mártebesine qatysty usynystarǵa» qol qoıdy.
Kásibı merekede ustazdar men tárbıeshilerge qurmet gramotalary tabys etilip, mektepterde baıqaýlar, konsertter, basqa da túrli merekelik sharalar uıymdastyrylady. Búkil álemde jáne Qazaqstanda muǵalimderdi elimizdiń joǵary laýazymdy tulǵalary, memlekettik jáne jergilikti atqarýshy organdardyń basshylary quttyqtaıdy.
«Ahmet Baıtursynuly atyndaǵy «Taldaý» bilim berýdi zertteý jáne baǵalaý ulttyq ortalyǵy» AQ málimetteri boıynsha búginde Qazaqstan mektepterinde 340 958 muǵalim jumys isteıdi. Onyń 66 648-i erler, 274 310-y áıelder.
2023 jyldyń 1 qyrkúıeginen bastap mektepke deıingi tárbıe men oqytý pedagogteriniń jalaqysy taǵy 30 paıyzǵa ósti. 220 myńnan astam qazaqstandyq pedagog attestasııa nátıjeleri boıynsha taǵaıyndalǵan biliktilik sanaty úshin jalaqysyna ústemeaqy alady. Mysaly, sheber muǵalim 50%, muǵalim-zertteýshi 40%, sarapshy muǵalim 35%, oqytýshy-moderator 30% alady. Jalpy respýblıka boıynsha pedagog-moderatorlar sany – 73 820, sarapshylar – 81 168, ǵylymı qyzmetkerler – 71 141, magıstrler – 3482.
10 jyldan beri Qazaqstanda jyl saıyn arnaıy «Úzdik muǵalim» baıqaýy uıymdastyrylyp keledi. Oǵan menshik nysanyna jáne vedomstvolyq baǵynystylyǵyna qaramastan mektepke deıingi, orta, tehnıkalyq jáne kásiptik bilim berý uıymdarynyń shtattyq pedagogıkalyq ujymy qatysady. Baıqaý úsh kezeńde ótedi: I — aýdandyq/qalalyq deńgeı, II — oblystyq deńgeı; III – respýblıkalyq deńgeı. Jyl saıyn kásipqoılar «Úzdik pedagog» ataǵynyń ıegeri atanyp, osyǵan oraı saltanatty túrde «Úzdik pedagog» tósbelgisin, sondaı-aq 3 mıllıon teńge kóleminde aqshalaı syıaqy alady.
