Foto: primeminister.kz
«Amanat» partııasynyń, Aýyl sharýashylyǵy, Sıfrlyq damý jáne aeroǵarysh ónerkásibi mınıstrlikteriniń, oblys ákiminiń ókilderi qatysty. Keńeste «Aýyl amanaty» jobasynyń oryndalý barysy aıtyldy.
«Aýyl sharýashylyǵy mınıstriniń orynbasary Baǵlan Bekbaýov baǵdarlama aıasynda bólingen 100 mlrd teńgeniń 51%-dan astamy ıgerilgenin jetkizdi. Alaıda keı óńirlerde bul kórsetkish 10%-ǵa da jetpeıdi. Esesine keı aımaqtar bekitilgen somany tolyq ıgerip, nesıe alýǵa ótinishter qabyldaýdy toqtatty. Máselen, Qostanaı oblysy ákiminiń orynbasary Rınat Muhametqalıev búginge deıin 141 jobaǵa ótinish kelip túskenin aıtty. Al bólingen 1,6 mlrd teńge jetkiliksiz, taǵy 800 mln teńge qajet», delingen Úkimet habarlamasynda.
Úkimet basshysynyń orynbasary T.Dúısenova óńirlerdiń ıgermegen qarajatyn qajetsingen ózge oblystarǵa bólýdi zań sheńberinde qarap júzege asyrýdy júktedi.
«Aýyl amanaty» jobasy aıasynda aýyl turǵyndary 5-7 jylǵa 2,5 prosenttik ústememen mıkronesıeler rásimdeı alady. Biraq Túrkistan oblysynda bıýdjettik mekeme qyzmetkerleri ıaǵnı muǵalimder men dárigerler nesıe rásimdeýge asa yqylas tanytyp, ótinish bildirgen. Alaıda nesıe berýdiń erejesinde bıýdjettik, memlekettik qyzmetkerlerge «Aýyl amanaty» jobasy boıynsha nesıe rásimdelmeıdi. Talqylaý kezinde bul másele de nazardan syrt qalǵan joq. Aýyl azamattarynyń ál-aýqatyn arttyrý maqsatynda júzege asyrylatyn «Aýyl amanaty» boıynsha nesıe rásimdegisi keletin jandarǵa túrli tosqaýyldardyń da kezigetini keńeste aıtyldy.
T.Dúısenova kedergilerdi joıyp, sanǵa emes, sapaǵa jumys isteý qajet ekenin eskertti.
