Atap aıtar bolsaq, jýyrda ǵana Germanııanyń Galle qalasynda ótken ATR 500 sanatyndaǵy týrnırdiń jeńimpazy, álemdik reıtıngte 26-orynda turǵan elimizdiń erler quramasynyń kóshbasshysy Aleksandr Býblık, «Úlken dýlyǵa» týrnırleriniń úsh dúrkin jeńimpazy, Beıjiń Olımpıadasynyń chempıony, ATP sanatyndaǵy 19 týrnırdiń bas júldegeri, Devıs kýboginiń ıegeri jáne álemniń burynǵy úshinshi raketkasy shveısarııalyq Sten Vavrınka, «Úlken dýlyǵa» jáne ATP sanatyndaǵy 17 týrnırdiń jeńimpazy aýstrııalyq Domınık Tım, álemniń 32-raketkasy Sebastıan Korda (AQSh), reıtıngte 40-orynda turǵan Alekseı Popyrın (Aýstralııa) jáne taǵy basqa tennısshiler elordadaǵy jarystyń kórigin qyzdyrdy.
Sol sportshylardyń ishinde dúnıejúzilik reıtıngte 34-orynda turǵan fransııalyq Adrıan Mannarınonyń baǵy jandy. Segiz kúnge jalǵasqan básekede barlyq qarsylasynan basym túsken Mannarıno bıylǵy «Astana Open ATR 250» týrnıriniń jeńimpazy atandy. Bas júlde úshin ótken básekede Adrıan álemniń 28-raketkasy amerıkalyq Sebastıan Kordany 4:6, 6:3, 6:2 esebimen tize búktirdi. Fransııalyq tennısshi «Astana Open ATR 250» týrnıriniń fınalyna ekinshi márte shyǵyp, birinshi tıtýlyna qol jetkizdi. Osydan úsh jyl buryn, ıaǵnı 2020 jyly elordada alǵash ret uıymdastyrylǵan básekeniń fınalynda ol aýstralııalyq Djon Mılmanǵa jol bergen edi.
Adrıan Mannarınonyń bıylǵy «Astana Open ATR 250» dodasyndaǵy júrip ótken jolyna úńiler bolsaq, ol bastapqy bəsekelerde otandasy Artýr Rınderkneh (7:6, 6:2) pen 21 jastaǵy reseılik Alıbek Kachmazovty (6:2, 5:7, 6:3) jarys jolynan yǵystyrsa, shırek fınalda aýstrııalyq Iýrıı Rodıonovtan basym tústi – 6:1, 7:6. Al jartylaı fınalda taǵy bir aýstrııalyq tennısshi Sebastıan Ofnerdi jeńip (6:4, 6:2), fınalǵa joldama alǵan-dy.
Sondaı-aq elordadaǵy jarystyń juptyq básekesinde amerıkalyqtar – Natanıel Lemmons pen Djekson Ýıtroý top jardy. Muhıttyń arǵy betinen kelgen tennısshiler sheshýshi matchta horvatııalyq Mate Pavıch pen aýstrııalyq Djon Pırs jubyn asa tartysty ótken kezdesýde 7:6 (7:4), 7:6 (9:7) esebimen jeńdi. Natanıel Lemmons pen Djekson Ýıtroý 2021 jyly Astanada ótken «ATP Challenger 125» serııasynyń týrnırinde de jeńiske jetken edi.
О́kinishke qaraı, óz elimizde ótken týrnırde otandastarymyz jergilikti jankúıerlerdi jarqyn oıyndarymen qýanta almady. Aleksandr Býblık ekinshi aınalymda aýstrııalyq Sebastıan Ofnerden 6:4, 6:2 esebimen jeńilse, Mıhaıl Kýkýshkın alǵashqy aınalymda-aq súrindi. Ol portýgalııalyq Nýno Borgestiń osal tusyn taba almady – 7:5, 6:7. 4:6. Juptyq synda baq synaǵan Aleksandr Nedovesov Ekvador ókili Gonsalo Eskobarmen birge shırek fınalǵa deıin jetse, A.Býblık pen A.Golýbev alǵashqy aınalymnan árige asa almady.
«Astana Open ATR 250» týrnıriniń statıstıkasyna toqtalar bolsaq, elordadaǵy «Beeline Arena» Ulttyq tennıs ortalyǵynda ótken segiz kúndik básekeni 16 myńnan asa jankúıer tamashalaǵan eken. Sondaı-aq týrnır aıasynda tennısshiler dástúrli túrde Qazaqstan tennıs federasııasy uıymdastyratyn áleýmettik mańyzdy is-sharalarǵa qatysty. Sten Vavrınka, Domınık Tım, Aleksandr Býblık jáne Sebastıan Korda «Asyl Mıras» aýtızm ortalyǵyna barsa, týrnırdiń fınalısteri Adrıan Mannarıno men Sebastıan Korda qalyptasqan dástúr boıynsha Ulttyq tennıs ortalyǵy janyndaǵy «Chempıondar alleıasyna» aǵash otyrǵyzdy.
