2023 jyldyń birinshi jartyjyldyǵynda IT qyzmet el ekonomıkasyna 476,8 mlrd teńge alyp kelgen. Bul ósimniń 90 paıyzy Astana men Almatyǵa tıesili. Kompıýterlik baǵdarlamalaý, konsýltasııalyq jáne basqa da ilespe qyzmetter kólemi byltyrǵa qaraǵanda 56 paıyzǵa ulǵaıǵan. Bul ekonomıkanyń baqylanbaıtyn sektoryn qospaǵandaǵy kórsetkish ekenin eskergen jón.
Jalpy, sektordaǵy ósim 2016 jyldan beri baıqalyp otyr. Sıfrlyq qyzmetterdiń jaǵdaıy ár qalada ártúrli. Dálirek aıtar bolsaq, Almatydaǵy kórsetkish 215,4 mlrd teńgege jetse, elordada 212,1 mlrd teńgeni quraǵan. Úshinshi orynda Batys Qazaqstan oblysy tur – 7,1 mlrd teńge. Eń tómengi kórsetkishter Ulytaý, Túrkistan jáne Jetisý oblystarynda tirkelgen.
IT – suranysqa ıe, san qıly sala. Onyń ishinde baǵdarlamalyq qamtamasyz etýdi qoldaý qyzmetteri men memlekettik elektrondy aqparattyq júıelerdi qalyptastyrý, aqparattyq-kommýnıkasııalyq ınfraqurylymdy basqarý qyzmetteri aldyńǵy qatarǵa shyǵyp tur.
Nátıje – jaqsy. Demek ónimdi arttyratyn óndirýshiler de artýy qajet. Osyǵan oraı Memleket basshysy 2025 jylǵa qaraı kem degende 100 myń joǵary bilikti IT mamandy daıarlaý mindetin qoıyp, tapsyrma bergen edi. Premer-mınıstrdiń resmı resýrsyna súıensek, otandyq joǵary oqý oryndarynyń IT fakýltetterindegi stýdentter sany artyp keledi. Sondaı-aq ár óńirde zamanaýı IT mektepter salý saıasaty da júzege asyrylyp jatyr. Ondaı mektepter ınnovasııalyq ekonomıkany qurýǵa qajetti kadrlyq bazany tolyqtyra túsedi.
Qazir IT kásipterdiń 70 paıyzy áli naryqqa shyqpaǵan ýaqytta ómir súrip jatyrmyz. 2025 jylǵa qaraı álemde IT ázirleýshilerdiń tapshylyǵy 17 mln adamdy quraıdy degen boljam bar.
