Irgetasy 1911 jyly qalanǵan Plzen qalasynyń komandasy – óz eliniń dańqty ujymdarynyń biri. Atalǵan klýbtyń akademııasynan 2003 jylǵy «Altyn dop» ıegeri Pavel Nedved, óz zamanynda álemniń eń úzdik qaqpashylarynyń biri bolǵan Petr Cheh jáne taǵy basqa tanymal fýtbolshylar túlep ushqan. Bir ǵasyrdan asa tarıhy bar «Vıktorııa» 1990 jyldan beri Chehııa chempıonatynda alty márte top jaryp, eki márte Chehııa kýbogi men Sýperkýbogin jeńip alǵan. Sonymen qatar jyl saıyn Eýrokýboktiń ártúrli lıgalarynda toptyq kezeńde oınap keledi.
Elordalyq ujym buǵan deıin Chehııa komandalarymen túrli týrnırlerde oınaǵanymen, «Vıktorııa» klýbymen alǵash ret jasyl alańda jolyqty. Degenmen chehııalyqtar bir maýsymda úshinshi ret Qazaqstan komandalarymen joldary túıisip otyr. Eń ókinishtisi, sonyń barlyǵynda da Plzen komandasynyń baǵy janǵan. Bıylǵy Eýrokýbok oıyndarynyń irikteý kezeńinde «Vıktorııa» Qostanaıdyń «Tobylymen» jolyǵyp, eki rette de jerlesterimizdi qapy qaldyryp ketti. Qostanaıda ótken alǵashqy matchta qonaqtar 1:2 esebimen jeńiske jetse, óz alańyndaǵy qarymta oıynda «Tobyldyń» qaqpasyna jaýapsyz úsh gol soqqan edi.
Konferensııa lıgasynyń toptyq kezeńiniń jerebesi tartylyp, «Vıktorııa» «Astanamen» bir topqa túskende el jankúıerleri elordalyqtar «Tobyldyń» esesin qaıtarady dep kútken edi. О́kinishke qaraı, «Astana» fýtbolshylary jankúıerler senimin aqtaı almady. Tipti keshegi match aldyndaǵy baspasóz máslıhatynda «Astana» bapkeri Grıgorıı Babaıan «Tobyldyń» jattyqtyrýshy quramynan «Vıktorııany» «qalaı jeńýge bolady» dep te aqyl-keńes suraǵanyn jasyrmaı, jalpaq jurtqa jaıyp salǵan edi. Alaıda eki bapkerdiń aıla-tásili bir chehııalyq jattyqtyrýshynyń taktıkasynan asyp kete almady.
20 myńǵa jýyq jankúıer tamashalaǵan elordadaǵy matchty «Astana» fýtbolshylary belsendi bastap, oıynnyń 21-mınýtynda Marın Tomasov qarsylas komanda qaqpashysynyń óreskel qateliginen keıin kezdesýdiń esebin ashqan edi. Biraq VAR júıesinde otyrǵan tóreshiler bas tóreshige Tomasovtyń goly oıynnan tys jaǵdaıda soǵylǵanyn dereý eskertip, goldy esepke almaı qoıdy. Sóıtip, birinshi taım teń eseppen aıaqtaldy.
Kezdesýdiń ekinshi bóliginde de Grıgorıı Babaıan shákirtteri «Vıktorııa» qaqpasynyń mańaıyndaǵy qaýipti shabýyldaryn bir sátke de toqtatqan joq. 51-mınýtta oń qaptaldan qaqpaǵa qaraı júıtkip kele jatqan Dembo Darbo bir qaıyrylyp aldy da, dopty ashyq turǵan Tomasovqa uzatty. Horvatııalyq legıoner óz ádetinen jańylmaı, aldymen qarsylastyń bir-eki qorǵaýshysyn aldap ótti de, dopty qaqpanyń oń jaq qaptalyna qaraı shirene tepti. Jol-jónekeı «Vıktorııa» qorǵaýshysyna tıgen dop baǵytyn ózgertip, qaqpanyń sol jaq buryshynan tabyldy – 1:0.
Degenmen, «Astana» jankúıerleriniń bul qýanyshy uzaqqa sozylmady. Aınaldyrǵan úsh mınýttyń ishinde «Vıktorııa» fýtbolshylary eki gol soǵyp, tarazy basyn ózderine aýdardy. Aldymen 54-mınýtta Tomash Hora dopty basymen Iosıp Chondrıch qorǵaǵan qaqpaǵa dál baǵyttasa, 57-mınýtta Lýkas Kalvach aıyp alańynyń syrtynan dál soqqymen kózge tústi. Grıgorıı Babaıan teń nátıjege qol jetkizý úshin ekinshi taımda alańǵa Abat Aıymbetov, Maks Ebong sekildi fýtbolshylardy shyǵarǵanymen, match sońyna deıin tablodaǵy kórsetkish ózgermedi.
Osylaısha, qatarynan eki matchta jeńilgen «Astana» óz tobynda soqyr upaımen kósh sońynda qalyp qoıdy. Al alǵashqy eki týrda 100 paıyzdyq nátıje kórsetken «Vıktorııa» alty upaımen kósh bastady. Toptaǵy ekinshi oıynda Kosovonyń «Balkanı» komandasy osy týrdyń sensasııasyn jasap, óz alańynda Horvatııanyń «Dınamosyn» 2:0 esebimen tize búktirdi. «Balkanı» birinshi týrda «Vıktorııaǵa» jol bergen edi – 1:0.
«Astana» toptyq kezeńdegi kelesi oıynyn 26 qazanda syrt alańda Kosovonyń «Balkanı» ujymymen ótkizedi. Al Zagrebtiń «Dınamosy» Horvatııada «Vıktorııany» qabyldaıdy.
