«Egemenniń» eń qart oqyrmany

Is-shara barysynda «Tobyl» fýt­­bol klýby­nyń medıa-ofı­­seri Qas­qyr­baı Qoı­shy­manov el gazetiniń eń qart oqyr­ma­ny, 99 jastaǵy maıdanger-jýrnalıst Qasym­han Aldabergenovke «Egemen Qazaqstan»-nyń bir jyldyq ja­zy­lymyn tartý etip, túbir­tegin qolyna ustatty.

– Burynǵy «Sosıalıstik Qazaq­stan», búgingi «Egemendi» 77 jyl boıy úzbeı oqyp ke­lemin. Salıqaly, salmaqty eń bir súıikti gazetim. Oqyp qana qoımaı, keıbir kókeıkesti máse­leler tóńiregindegi oı-piki­rim­di ózim de jazyp turamyn. Máselen, osydan biraz jyl buryn «Terme degen termındi teris buryp baramyz» degen kólemdi maqalam jarııalandy. Ol kezde el ishinde bireý «Áý» dese, «О́ı, bul termeshi ǵoı!» deıtin bir úrdis paıda bolǵan. Sonyń jónin aıtý maqsatynda jazylǵan dúnıe edi, – deıdi ardager. 

Aksııanyń ashylý rá­si­minde «Qaz­poshta» AQ Qos­tanaı oblystyq  fılıa­ly­nyń basshysy Qaırat Sa­ǵadıev gazet-jýr­naldardyń qo­ǵamdyq oı-sanany ilge­riletetin, kúndelikti ma­ńyzdy aqparattarmen habardar etip otyratyn aıtýly qural eke­nin atap ótip, kópshilikti 2024 jyl­ǵy jazylym naýqanynyń bas­talýymen quttyqtady.

– Bıyl «Qazposhta» 30 jyldyq belesin baǵyndy­ryp otyr. Poshta qyzmetkerle­ri­niń jalaqysyn ósirý másele­si de birtindep óz sheshimin ta­ýyp keledi. Biz qazir merzim­di baspasózdiń taralymyn ke­ńeıtý, gazet-jýrnaldardy keshiktirmeı oqyrmanǵa jet­kizý baǵytynda jumys istep jatyrmyz. Bıyl óńir­degi iri kásiporyndardyń bas­shylarmen kezdesip, jazylym aıasyn ulǵaıtý jóninde usynys aıt­qan edik, ókinishke qaraı, kóbi qoldaý bildire qoı­mady. Sondaı-aq shal­ǵaı aýyldarǵa gazet jetkizý má­se­lesi de tolyq sheshile qoıǵan joq. Buǵan shal­­ǵaı aýylǵa qatynaıtyn kóliktiń, adam­­nyń tapshylyǵy qolbaılaý bolyp tur. Qysta aýa-raıynyń qo­laısyzdyǵy kedergi bolady. Biraq bıyl­dan bastap gazet tasymalyn baqylaıtyn KRI júıesi engi­zi­ledi. Jańa júıe baspahanadan shyqqan gazettiń oqyrman qo­lyna qaı ýaqytta tıgenine deıin onlaın baqylap otyrýǵa múmkindik beredi, – dedi fılıal basshysy.

Ári qaraı ár merzimdi basylym ókilderi ózderine arnaıy bólingen jazylym ornyna jaı­ǵasyp, kelimdi-ketimdi tur­ǵyndarǵa gazettiń shyǵý jıi­ligi, aılyq, jartyjyldyq, jyl­­dyq baǵasy men oǵan jazylý jol­dary týraly aqparat ber­di. Bir­­qatar baspasóz qu­ral­dary ja­­zylym lotoreıa­laryn oınatyp, turaqty oqyr­man­da­ry­na shaǵyn kádesyılar tartý etti.

Qostanaı oblysy