Qasym-Jomart Toqaev jıynǵa qatysýshylardy Álemdik jáne dástúrli dinder kóshbasshylary sezi hatshylyǵynyń HHI otyrysynyń ashylýymen quttyqtady.
«Bıyl – alǵashqy Sezdiń shaqyrylǵanyna 20 jyl. Bul ıgi bastama óziniń ómirsheńdigin dáleldep, az ýaqyt ishinde mańyzdy órkenıetaralyq dıalog alańyna aınaldy. Forým dinaralyq tatýlyq pen kelisimdi nyǵaıtýǵa, búkil adamzatqa ortaq túıtkilderdiń sheshimin tabýǵa jáne toleranttylyqty dáripteýge septigin tıgizip keledi. Basqosý aıasynda álemniń rýhanı kóshbasshylary jahan jurtyn alańdatqan ózekti máselelerdi talqylap, beıbitshilikti saqtaý jáne ózara qurmet pen syılastyqty nasıhattaý týraly oılaryn ortaǵa salady. Qazir geosaıası ahýal ýshyǵyp, túrli syn-qater kúsheıip tur. Osy almaǵaıyp kezeńde izgilik, meıirimdilik, baýyrmaldyq, jaýapkershilik sııaqty qaǵıdattardyń qadiri arta tústi. Sondaı-aq halyqaralyq qaýipsizdiktiń jańa júıesin qalyptastyrý óte mańyzdy máselege aınaldy. Ol úshin álem halqyn beıbitshilikke shaqyratyn jańa jahandyq qozǵalys qajet. Bul rette din kóshbasshylary aıryqsha ról atqarady», dedi Memleket basshysy.
Prezıdent Hatshylyqtyń búgingi otyrysy mazmundy ári tabysty ótetinine senim bildirdi.
Sonymen qatar Qasym-Jomart Toqaev Qazaqstan dinaralyq jáne órkenıetaralyq yntymaqtastyqqa negiz bolatyn bastamalarǵa árdaıym qoldaý kórsetetinin, ony syrtqy saıasattyń negizgi basymdyqtarynyń biri retinde ustanatynyn atap ótti.
Prezıdent jıyn qatysýshylaryna alǵys aıtyp, olardyń izgilik jolyndaǵy isterine tolaıym tabys tiledi.
