Meńdiqara, Sarykól, Qarasý aýdandaryndaǵy jylý bazalaryndaǵy taskómirdiń tonnasy – 25 myń teńge. Al ol jerden aýyldyq okrýgterge kómir tasıtyn kólikter shaqyrymyna 300-350 teńge qun surap tur. Mysaly, Meńdiqara aýdanynyń ortalyǵy Borovskoı men Teńiz aýylynyń arasy 40-45 shaqyrymdaı bolady. Al Teńizdegi bir úı qystaı shamamen 5-6 tonna kómir jaǵady desek, oǵan aýdan ortalyǵynan kómir jetkizip berýshiniń eńbegi 14 myń teńge turady.
Qarabalyq aýdanyndaǵy kómirdiń tonnasy 17 myńnan bastalyp, 18 500 teńgege deıin barady. Mysaly, Toǵyzaqtaǵy «Bogatyr kómir» seriktestiginde Shubarkól kómiri tonnasyna 17 myń teńgeden bolsa, Qarabalyqtyń basyndaǵy «Astyq alıans» seriktestigi dál osy kómirdi 18 myńnan satyp jatyr.
Toǵyz joldyń torabynda jatqan Amanqaraǵaıdaǵy temirjol tuıyǵynda taskómirdiń tonnasy – 18 myń teńge. Áýlıekól, Naýyrzym aýdandaryna kómir osy jerden barady. Ony jetkizip beretin kólikterdiń quny ár aýyldyń alys-jaqyndyǵyna baılanysty. Máselen, Amanqaraǵaıdan 40 shaqyrym qashyqta jatqan Sulýkól aýylynyń turǵyndary kómir jetkizip bergen kólik júrgizýshisine 26 myń teńge ustatady. Al Naýyrzym aýdanynda otyn tasýdy kásip etken jeke kólikter kómirdiń tonnasyn 25 myń teńgeden satyp júr.
Torǵaı óńirindegi aǵaıyn qysqy otynyn jylda tikeleı Shubarkólden jetkizip alýshy edi. Bıyl ol jol jabylyp, qazir Arqalyqtan tasyp jatyr. Jangeldın, Amangeldi aýdandarynda byltyr bir tonna kómirdiń quny 19-20 myń teńge edi, qazir 25 myń teńge turady. Amangeldiniń jylý bazasyndaǵy sapaly kómirdiń tonnasy – 26 myń teńge.
