Abaı oblystyq Mádenıet, tilderdi damytý jáne arhıv isi basqarmasynyń uıymdastyrýymen shymyldyǵyn ashqan aıtýly mádenı shara eki kúnge jalǵasady. Elimizdiń Almaty, Shymkent, Jezqazǵan, Kókshetaý, Túrkistan, Aqtóbe, Atyraý, Semeı qalalarynan kelgen 19 jas talanttyń ónerin Qazaqstannyń halyq ártisi, Memlekettik syılyqtyń laýreaty Nurjamal Úsenbaeva bastaǵan qazylar alqasy baǵalaıtyn bolady.
Baıqaý bastalar aldynda arnaıy ótkizilgen baspasóz máslıhatynda sóz alǵan Nurjamal Pernebekqyzy atap ótkendeı Beken Jylysbaev qazaq vokal óneriniń patrıarhy retinde osynaý bekzat ónerdiń negizin salýshy biregeı tulǵa retinde erekshelenedi.
«Biz úshin aldymen Beken Jylysbaev – qazaq ónerinde vokal mektebiniń qalyptasýyna bar ǵumyryn arnaǵan úlken talant ıesi. San talanttyń qanatyn qataıtqan ǵajaıyp ustaz. Ol ustaz ǵana emes, bárimizge ákelik qamqorlyǵyn da aıamaıtyn úlken júrektiń ıesi edi. Biz búgin sol ardaqty ustazymyzdyń týǵan jeri – Semeı qalasyna, qasıetti Abaı eline kelgenimizge erekshe qýanyshtymyz. Ustazymyzdyń atyn ulyqtap, osyndaı baıqaý ótkizýge muryndyq bolǵan Abaı oblysynyń ákimdigine zor alǵysymyzdy bildirgimiz keledi. Beken Jylysbaev biz úshin qazaq vokal óneriniń patrıarhy retinde máńgilik qurmetpen atalady. Osy baıqaýǵa qatysýǵa talaptanyp, óner kórsetýdiń ózi qatysýshylar úshin zor baqyt dep oılaımyn», degen Nurjamal Úsenbaeva jas talanttarǵa sáttilik tiledi.
Eki kezeńnen turatyn respýblıkalyq baıqaý qorytyndysy erteń, 13 qazan kúni keshkisin Abaı atyndaǵy teatrda jarııalanyp, Gala-konsertpen túıindeletin bolady.
