Bir qýanyshtysy, baıqaý bastalǵan alǵashqy jyldarǵa qaraǵanda qatysýshylar Kenen Ázirbaev shyǵarmalaryna tereń boılaı bastaǵan. Áýelde jan-jaqtan kelgen talantty ónerpazdar kompozıtordyń «Shyrqa, daýsym», «Kóksholaq», «Qaıran jastyq» sekildi sanaýly ánderin qaıtalap shyrqap, kórermendi jalyqtyryp jiberetin. Endigi kózqaras ózgeshe. Áıtse de, aldaǵy ýaqytta Kenenniń oryndalmaı jatqan ózge de shyǵarmalary qatysýshylar nazarynan tys qalmasa deısiń.
«Dala folklorynyń myń jyly» arnaıy jobasyn júzege asyrý, qazaqtyń áıgili halyq aqyny, ánshi, kompozıtor Kenen Ázirbaevtyń shyǵarmashylyǵyn jańǵyrtý maqsatynda uıymdastyrylǵan baıqaýǵa 26 dástúrli ánshiniń qatysqanyn aıta ketken jón. Ár ánshiniń óz úni bar. Bastysy, olardyń barlyǵy da úlken daıyndyqpen kelgen. Sodan da bolsa kerek, Kenen shyǵarmalaryn júrekpen sezinip oryndady.
Respýblıkalyq baıqaý qorytyndysynda Almaty oblysynan kelgen Nursultan Elemesov bas júldege laıyq dep tanylyp, 1 mıllıon teńgeniń sertıfıkatyna ıe bolsa, júldeli birinshi oryn Túrkistan oblysynyń úkili úmiti Maǵjan Satybaldyǵa buıyrdy. Qazylar alqasynyń sheshimimen qaraǵandylyq Madııar О́mirǵalı men qostanaılyq Jasulan О́temuratov ekinshi oryndy ıelense, úzdik úshtikti jambyldyq Aıda Sraıyl men astanalyq Alýa Baýyrjanqyzy túıindedi. Sondaı-aq «Kenen ata» qory taǵaıyndaǵan arnaıy júlde jambyldyq ánshi Mereı Abýevaǵa tabystaldy. Konkýrs dıplomanty atanǵan jeti qatysýshy da qarjylaı syılyqtan qur qalǵan joq.
Is-shara barysynda Kenen Ázirbaev atyndaǵy oblystyq fılarmonııanyń 55 jyldyǵyna oraılastyrylyp, «Án kemeńgeri – Kenen» atty gala-konsert uıymdastyryldy. Oǵan esim-soıy elimizge belgili estrada juldyzdary qatysyp, ánnen shashý shashty.
Bul kúni Balasaǵun atyndaǵy ortalyq konsert zalyna jınalǵan ónersúıer qaýym Kenen Ázirbaevtyń «Tik shyrqaý», «Shyrqa, daýsym», «Kóksholaq», «Eńbekshi elim», «Bazar-Nazar», «Jas ekpin», «Mórtaı sulý», «El qýanyshy» sekildi ózge de ásem ánderin san túrli daýys ıeleriniń shyrqaýynda tyńdap, qoshemet kórsetti.
Taraz
