Qos belbeý úshin aıqas

AQSh-tyń Tehas shtatyndaǵy Rozenberg qalasynda ótetin úl­ken jekpe-jek keshi eki boks­shy úshin de mansabyndaǵy eń mańyzdy kezdesýdiń biri bolmaq. Sebebi bul aıqasta eki boksshy da ózderine tıesili orta salmaq­tyń eki beldigin báske tigip otyr. Jeń­geni – eki tujyrym boıynsha álem chempıony ataǵyna qol jet­kizse, jeńilgeni osy kezge deıin jınaǵan ataq-abyroıynan aıy­rylyp, chempıondyq beldiksiz qalady. Onyń ústine jeńilissiz kele jatqan bir boksshynyń statıstıkasyna jeńilis jazylaıyn dep tur.

Mańyzdy jekpe-jek aldyn­­­da Jánibektiń qarsylasy Vın­chen­­so Gýalterı týraly oqyr­­man­ǵa ­az-kem málimet bere ketken­di jón kórip otyrmyz. Kásip­qoı boks áleminde endi-endi tanylyp kele jatqan 30 jas­taǵy Vın­chen­so Gýalterı 1993 jyldyń 4 qańtarynda Germa­nııanyń Výppertal qa­la­synda dúnıege kelgen. Áýes­qoı boks­ta aýyz tol­tyryp aıtar­lyq­taı jetis­tigi joq nemis jigiti 2015 jyl­dyń kúzinen beri kásip­qoı boks sharshy alańynda ju­dy­ryq­tasyp keledi. Sol kezden kúni búginge deıin 21 ret shar­shy alańǵa kóterilgen ol, barlyq básekesinde jeńiske jetti. Jeti kezdesýin merziminen buryn aıaq­taǵan. 2020 jylǵa deıin tek «qap­shyqtarmen» judyryqtas­qan Vınchenso keıinnen ózimen deń­geıles boksshylarmen kezdese bastady. Aldymen ol Aleksandr Pavlovty upaı sanymen je­ńip, Germanııa chempıony atansa, keıinnen bul ataǵyn Tomas Pıchchırılge qarsy ótken aıqas­ta sátti qorǵady. Al 2021 jyly argentınalyq Bıllı Godoıden basym túsip, IBF Inter-Continental beldigin jeńip aldy. Bul beldigin de eki márte qorǵaǵan soń bos turǵan IBF tujyrymy boıynsha álem chempıony ataný úshin London Olımpıadasynyń kú­mis júldegeri brazılııalyq Eskı­va Falkaomen judyryqtasýǵa múm­kindik aldy. Al Výpertalda ót­ken kezdesýde Gýalterı upaı sanymen jeńiske jetip, orta sal­maqtaǵy IBF beldigin chempıony atanyp shyǵa keldi. Bir aıta ­ke­terligi, Vınchenso Gýalte­rı ­21 jekpe-jeginiń barlyǵyn óz ­otanynda ótkizgen.

Jánibek Álimhanulyna keler bolsaq, otandasymyzdyń jú­rip ótken jolyn boks jankúıer­leri jaqsy biledi. Áýesqoı boksta birneshe dúrkin el chempıony atanyp, 2013 jyly Azııa jáne álem birinshiliginde top jardy. 2016 jyly Rıo Olımpıadasyna qatysqanymen, shırek fınal­dan árige asa almady. Sóıtip, 2016 jyly tolyǵymen kásipqoı boks­qa bet buryp, dańqty promoýter Bob Arým jetekshilik etetin «Top Rank» kompanııasymen ke­lisimshartqa otyrdy. Búginge de­ıin ol 14 ret rıngke kóterilip, bar­lyǵynda jeńiske jetti. Toǵyz qar­sylasyn nokaýtpen sulatyp saldy. 2021 jyly otandasymyz eks-álem chempıondary – Rob Brent­ty upaı sanymen, Hassan En­jıkamdy tehnıkalyq nokaýtpen jeńip, boks mamandary­nyń kó­zine túse bastady. Al 2022 jyly Dennı Dıgnýmdy ekin­shi raýnd­ta sulatyp salyp, WBO tujy­rymynyń ýaqytsha chempıon atandy. Al keıin jek­pe-jek ótkizbeı-aq álem chempıony ataǵyna qol jetkizdi. Búginge deıin Jánibek WBO belbeýin Denzel Bentlı men Stıven Bat­lerge qarsy ótken aıqasta eki már­te sátti qorǵady.

Álimhanuly – Gýalterı jek­pe-jegin boks jankúıerleri 15 qa­zan kúni saǵat 7.00-de «Qazsport» telearnasynan tikeleı efırde tamashalaı aldy. Sondaı-aq boks keshi «Qazaqstan.tv» mobıldi qosymshasy men qazsporttv.kz saıtynda onlaın translıasııalanady.