Foto: qazsporttv
«Atyraý oblysynyń týmasymyn. Ákemiz erte ómirden ótti de, úıdiń tuńǵysh balasy bolǵan soń anama qolǵabys etip, mektepti támamdap birden jumys istedim. Júk kóligin júrgizdim. 2006 jyly 23 jasymda jol kólik apatyna ushyrap, aýyr jaraqatpen aýrýhanaǵa tústim. Dárigerler ota jasap bir aıaǵymdy kesti. Árıne, moraldyq turǵydan da, rýhanı, fızıkalyq jaǵynan da aýyr soqqy boldy. «Anama qalaı kómektesemin? Baýyrlarym da kishkentaı, solarǵa masyl bolam ba?» degen oı maza bermeıtin. Bir jyldan keıin Baýyrjan Tahaýov esimdi bapker aǵaı otyryp oınaıtyn voleıbol sporty bar ekenin aıtyp, sol sportpen shuǵyldanýǵa shaqyrdy. Alǵashynda yńǵaısyzdandym. Bir aıaǵynan aıyrylǵan men úshin sportpen shuǵyldaný degen múmkin emesteı kórindi. Biraq bapker Baýyrjan aǵaı óziniń aqyl-keńesin aıtyp, kerisinshe rýhymdy jigerlendirdi. Osylaısha 2007 jyldan bastap paravoleıbolmen shuǵyldanyp júrmin. Ulttyq qurama sapyna ótý de ońaı bolǵan joq, ózińdi dáleldeı alǵanda ǵana qabyldaıdy. 2008 jyly ulttyq quramaǵa qabyldandym. Halyqaralyq dárejedegi sport sheberi ataǵyn aldym. Kelinshegim zaýytta zerthana qyzmetkeri, bes balam bar. Úlken ulym ýnıversıtette oqıdy, ekinshi qyzymyz kolledj stýdenti. Odan keıingi eki balamyz mektep jasynda, kenjemiz ekiden asty. Kelinshegim ázirge bala kútimimen úıde. Biz kóbinese syrtta bolamyz, oqý-jattyǵý jıyny, túrli jarysqa qatysý úshin aılap úı kórmeımiz. Kelinshegim balalardyń sabaǵyn da ózi qadaǵalap keledi. «Er azyǵy men bóri azyǵy jolda» demeı me, meniń mindetim - shańyraqtyń tutqasy retinde bala-shaǵama aqsha taýyp ákelý. Tek memleket tarapynan múgedektigim úshin beriletin járdemaqyǵa qarap otyrýǵa bolmaıdy. Paravoleıboldan ulttyq quramada oınaǵanymyz úshin bizge aı saıyn jalaqy tólenedi. Osylaı bireýden ilgeri, bireýden keıin ómir keship kelemiz.
Paravoleıbol sportyn tańdaǵanyma esh ókinbeımin. Kerisinshe, osy sporttyń arqasynda elimizdiń ár óńirinen joldas, dos taptym. Qazaqstan chempıonaty, Qazaqstan kýbogi, spartakıada syndy el ishindegi jarystarda bir-birimizge qarsylas bolsaq ta, ómirde tonnyń ishki baýyndaı aralasatyn joldaspyz.
Alda biz úshin úlken syn tur. Qytaıdyń Hanchjoý qalasynda ótetin Para Azııa oıyndarynda top jarý mindeti júkteldi. Bıyl para voleıboldan Azııa chempıonaty Astana qalasynda ótti, biz kelesi jyly Parıjde bolatyn jazǵy Paralımpıada oıyndaryna joldama ıelendik. Qytaıdaǵy Para Azııa oıyndarynda barymyzdy salamyz dep oılaımyn. Qalǵan sportshylarǵa da sáttilik tileımin», dedi Janǵalı Súıeýov.
