Ulttyq qurama oıyndaryna baılanysty «Qaırat» pen «Zenıt» qysqamerzimdi úzilisti tıimdi paıdalanyp, jankúıerlerge tamasha match syılady. 20 myńnan asa jankúıer tamashalaǵan Ortalyq stadıondaǵy oıyn teń eseppen aıaqtaldy – 2:2. Asa tartysty ótken kezdesýdiń esebin birinshi bolyp «Qaırat» fýtbolshylary ashty. Oıynnyń 8-mınýtynda «Qaırattyń» brazılııalyq shabýylshysy Joao Paýlo gol soqsa, 29-mınýtta qonaqtar sapynan Aleksandr Erohın esepti teńestirip ketti. Birinshi taım 1:1 esebimen aıaqtaldy.
Úzilisten keıin «Zenıttiń» bas bapkeri Sergeı Semak alańǵa brazılııalyq oıynshylaryn shyǵaryp, jeńiske jetýge tyrysyp kórdi. Biraq ekinshi taımdaǵy alǵashqy goldy da «Qaırat» fýtbolshylary soqty. 70-mınýtta Ofrı Arad komandasyn esepte taǵy da alǵa shyǵarǵanymen, reseılik komanda matchtyń aıaqtalýyna bes mınýt qalǵanda tarazy basyn qaıta teńestirip ketti. Bul joly Gýstavo Mantýan dáldik tanytty – 2:2. Osylaısha, eki klýb arasyndaǵy úshinshi joldastyq kezdesýde «Qaırat» birinshi ret «Zenıtpen» teń oınady. Munyń aldyndaǵy eki matchta da «Zenıttiń» mereıi ústem bolǵan edi.
